Naso binotohni halak mulak ma Tuan Dolog Hararasan iboban ma Tuan Sormaliat tongon hu Dolog Hararasan arianni ai, ompat borngin i dalan do sidea marborngin. Das ma i Dolog Hararasan ibayangkon ma tongon Tuan Sormaliat hu borno ni losung, ibahen ma bayanganni singkam na matah. Anggo singkam ondi seng ra matei, anjaha martunas do pakon marurat do use dokah-dokahni ari, nai ma parbayangni Tuan Sormaliat i Dolog Hararasan.
Dob ma das sapuluh borngin dokahni manungkun ma panak boru Nandorhaya di Bulan, bani Tuan Rahat di Panei, nini ma: ”Ou Bapa Anggi, ija do si Sormaliat, sapuluh borngin ma seng ongga roh hu rumah bolon be”. Nini Tuan Rahat di Panei marbalos: ”Domma huondoskon hu hutani tulangni i tanoh hapoltakan, ase hunjai ia mambuat boru, horja raja lobei ia apala satahun on. Pogothon hanima malah inang mangkorja pabolag juma, nai age martonuni ase dong holi bisaranta bani tulangmu hu hapoltakan”, nai ma nini bapa anggi ai.
Dokah-dokahni ari das ma use satahun, siholanma panak boru Nandorhaya di Bulan pakon panak boru Nandorhaya di Ari pakon puang bolon ni Parpandanan, seng ididah anakni ondi domma das satahun. Roh ma sidea tolusi hu rumahni Tuan Rahat di Panei, manungkun partibalni Tuan Sormaliat. Nini puang bolon ai ma: ”On ma da satahun anggi, naha do partibalni anakmu si Sormaliat? Ayaki ham ma ase nabotoh”, nini puang bolon ondi. ”Dear do kaha”, nini Tuan Rahat di Panei, tapi hu nagori na legan do ia laho; hira-hira sapuluh borngin, roh ma Tuan Rahat di Panei, ipatugah ma bani puang bolon ampa Nandorhaya di Bulan, nini ma: ”Anggo si Sormaliat satahun nari ase roh hu jon. Naha pe mamboban boru ma ia hu jon. Anggo domma das satahun nari, pongkuthon hanima ma lah pabolag juma ampa martonun, se dong holi idangkononta bani tondongta”, nai ma nini Tuan Rahat di Panei bani sin rumah bolon.
Dob ai use doah-dokahni ari das ma use tongon satahun, ai ma padua tahunkon lambin maganjang ma bayanganni i Dolog Hararasan. Ise pe lang mambotoh, leganni Tuan Rahat di Panei ondi do hansa. Sadangkan Tuan Rahat di Panei seng ibotoh atap na dob matei atap na manggoluh. Roh ma panak boru Nandorhaya di Bulan, lambin matutung do siholni mangidah botouni ondi. Malum ma gakni tene anggo siholni na masik i bayangan, manrosap do hubani botouni ondi ampa inangni ondi. Nini panak boru Nandorhaya di Bulan ma: ”Ou Bapa Anggi, ija do luat na suman, botouhu si Sormaliat, atap na mangoto-otoi do ham Bapa Anggi?” ”Lang”, nini Tuan Rahat di Panei, ”Pogothon hanima ma, naha pe ningon roh do ia, mamboban gaweimu”. Mulakma Nandorhaya di Bulan ipatugah ma hata ai hubani puang bolon, nai age hubani anggini panak boru Nandorhaya di Ari.
Ipogothon sidea ma tongon na hu juma, tapi tindang pangari-arion do hundul pangalolahan, anggo panak boru Nandorhaya di Bulan, seng ibotoh tontangni angkulani, halani siholni mangidah botouni ondi. Jumpah patarni use, laho ma ia martonun hu surambi ni pantangan itompuk ma bonangni ai, mangkarotap, ipudun sada rotap dua, ipudun dua rotap do sada, lutu ma uhurni, lutu homa bonangni ai, halani siholni botouni na marsik i bayangan. Sanggah mardalan bou si Borong-borong, aima amboruni, botouni Raja Parpandanan na Bolag do ai, nin panak boru ai ma mangkatahon ambouni ai: ”Ou ambou, ambou si Borong-borong, pudun ham ma lobei bonangku on, hupudun sada lambin rotap, hupudun lambin rotap, ambou si Borong-borong, holong ma ateimu!”
Naha nini bou si Borong-borong ai, nondo: ”Ai, anggingku, parumaenku, botoumu ai malah sarihon; na masik i bayangan dapot rusuk ni balei bolon, tunasni bayanganni!” Mintor tardosak ma darohni panak boru ai, anjaha lang be ibotoh tontang, anjaha mandurusma iluhni, sonin mando itadingkon bonang ai, laho ma ia hu rumah bolon, ijombahon mando dirini laho modom seng haru hu luluan, seng haru hu talaga, bartong mando ia i rumah ai, inunut marsuap-suap iluhni na mambogei habarni botouni ai.
Dob konsi ai roh ma puang bolon hu laman, idapotkon panak boru ai domma borat i tiang ai modom. Nini puang bolon ai ma: ”Mase soni parpodommu Nandorhaya di Bulan? Mase lang dompak luluan ulumin?” Nini panak boru ai ma marsampang: ”Ou Inang, sedong ngayot ni angkulaku ase modom au, dong do nongkan barita hu bogei, hum bai ambou si Borong-borong, nini do hu bangku: Botoumai malah sarihon, dapot tunasni rusuk balei bolon tunasni bayanganni! Anggo nini Bapa Anggi, bai tulang do si Sormaliat, hape na i bayangan do ia”. Jadi tarsonggot ma puang bolon ai mambogei hata ai, nini ma: “Laho ma hita inang hu rumahni mangkelamu, Guru Gumbak na Bolon huta on”.
Das ma sidea i rumah ni Guru Gumbak na Bolon, isungkun sidea ma tongon pasal kabar ai. Jadi marsahap ma bou si Borong-borong: ”Apala barita na tongon do na hubaritahon ai”, nini bou si Borong-borong ai, ”Tongon do anggo si Sormaliat domma ibayangan. Anggo nini tulang ni anggian ni dakdanak on, hu hutani tulangni do si Sormaliat, hape na ijualhon do hu Dolog Hararasan. Tapi ulang lobei ihabar-habarhon hanima ai. Marimas holi uhurni tulang anggian ni dakdanak on mangidah hanami!” nai ma nini bou si Borong-borong ai.
Tidak ada komentar:
Posting Komentar