Itobus Panak Boru Nandohaya di Bulan ma Botouni ai

Jadi use mangguru use ma panak boru Nandorhaya di Bulan bani Guru Gumbak na Bolon ai, nini ma: “Ou Mangkela, naha ma podahmu bangku mangayaki si Sormaliat ai?” “Naha ma hubotoh”, nini Guru Gumbak na Bolon, “Nasuru pe rayat in mangayaki, mabiar do mangidah Tuan Rahat di Panei. Agari ai pe, anggo taridah holi sahap on, manggila ma holi Tuan Anggi huta on mangidah hanami na sarumah on. Ai ma ase ulang lobei taridah sahap on panak boru, holong uhur nasiam i rumah on”. ”Jadi naha ma gakni mangkela, holongni uhurmu, masihol tumang ma uhurhu mangidah botouhu ondi”. Ihut mangkatariluhma matani panak boru ai mangkatahon ai. Holong ma uhurni guru ai mangida panak boru ai. Ibere ma sada podah. ”Anggo hubotoh panak boru, bisa do ham mangayaki, ase baen hita riah madear”. ”Anggo bisa nimu mangkela, bisa do”, nini panak boru ai, ”maningon huayaki do botoungkai”.

Jadi marsahap ma Guru Gumbak na Bolon anjaha mambere podah, ”Parlajari ham ma lobei matani judi”. Jadi iajari Guru Gumbak na Bolon ma panak boru ondi marjudi. Kira-kira tolu ari ibotoh ma. Dob ai, ipakei Guru Gumbak na Bolon ma panak boru ai, pakean dalahi ma ibere, amnrantei gotong anjaha mardarmani, martumbuk lada, marbaju-baju dalahi, isuruh ma hasomanni sapuluh dua halak puang lima martanja marbodil, marhopala perak, na laho mangayaki Tuan Sormaliat hu Dolog Hararasan. Laho ma sidea tongon.

Das ma saborngin i dalan, adong ma sada ijai parjudian, i lambung huta ai, marjudi ma Tuhan ai. Tuhan ma lobei goranni, ai seng ibotoh halak naboruh ia, sah songon dalahi do anggo torihon. Monangma marjudi, anjaha buei ma hasomanni na mangihutkonsi. Jadi anggo hasomanni na sapuluh dua halak ondi ipaulak ma sidea hu Parpandanan na Bolag, nini uhurni panak boru ai do i bagas, ”Anggo hubobab holi tene hasomanku na hun Parpandanan on, bahaya do holi langkahku, lang tarbahen lang taridah do holi rahasiani halak on” nai ma inunut marpanariani i bagas uhurni. Ai do ase ipaulak na sapuluh dua halak ai. Jadi onom halak mando hasomanni na laho hu Dolog Hararasan on, nai homa jumpah parbornginan, marbornginma sidea. Jumpah ma use patarni mardalan ma use sidea. Patolu bornginhon dohor ma Dolog Hararasan , paompathon, marborngin homa ma sidea i tongah dalan, dong homai do parjudian. Jumpahsi tiga namargoran Tiga Parsingguran. Tanoh parsaoran na mangalop boli-bolian, na manjalo tuhor-tuhoran, monang homai ma tuhan ondi, i parjudian ai. Anjaha dong homai do namangihut tolu halak. Das ma siah halak juak-juakni ai haganup. Tunggung ma sidea mardalan, jagar ma sidea hundul.

Das ma sidea i Dolog Hararasan, hira-hira guling matani ari dong ma homai parjudian i horbangan ni Dolog Hararasan ai, bosar homai do anggo parjudian ai. Jalintari do goranni anggo sugara ai, Sidabungkei do morgani, ai martutur do tuhan ai pakonni sugara ai, anjaha manungkun homai do sugara ai bai tuhan ai atap hunja haborhatanni.

Jadi ilepakhon do goranni huta Parpandanan na Bolag. Ihatahon do Dolog Ilir. Dob ai marjudi ma sidea pakonni halak na legan-legan, marjudi ma pakonni Tuan Dolog Hararasan, tarsongon do judi ai lang marsipapuasan uhur bei, ai domma bod ari. Jadi marsahap ma Tuan Dolog Hararasan, ”Ou Lawei”, nai ma nini, ”Pagirah hita patar judinta on. Sugara in lobei, paraparahon lobei ruji-rujian in”.

Jumpah ma tongon ari patarni use, roh ma Tuan Dolog Hararasan hubani gaduh parjudian ai, gaduh goranni parjudian ai. Marlawan ma ia pakon tuan na roh ondi. Hundul bei ma sidea martontang muka, hun timur ma na roh ondi parhundulni, hampir barat ma parhundulni Tuan Dolog Hararasan. Tapi anggo sugara, suhi do iananni. Dob ai idabuh sugara ma rampah ai, nini sugara ai ma: ”Ou rampah sidua-dua, hudabuh ma ham; marsunsang ma na talu, mangambai ma na monang! Pak!” Idabuh ma rampah ai, ihur ma ”rrrrrr” nini. Dob ai marsitauran ma Tuan Dolog Hararasan pakon tuan na roh ai. Tari ale tari nini hun lopah, duga le hu duga, nini na hun lopah use. Jadi marpasang ma sidea, pak! Idabuh ma rampah ai. Tapi manilah opei, seng marsiutangan. ”Dabu ale, dabu!” nini hun lopah. ”Pak”, idabuh ma. Luar ma tari, iduruk Tuan Dolog Hararasan hubani imbangni ai. Dua gual porang, ai ma opat hamata. Dabuh ale dabuh, nini use, ibaen ma bona pasangan. Sang korot nini Tuan Dolog Hararasan, duang korot nini imbangni ai, tolung korot nini Tuan Dolog Hararasan, ompat korot nini tuan na roh ai.

Dabuh nini. Idabuh ma tongon. Pak! Idoni Tuan Dolog Hararasan opei. Patolu halihon ”Patei”, nini Tuan Dolog Hararasan, ”Torbang” nini tuan na roh ai. ”Opat horot”, nini Tuan Dolog Hararasan, ”Ualuh horot”, nini imbangni ai. ”16 horot”, nini Tuan Dolog Hararasan, ”24 horot”, nini tuan na roh ai. ”Iah, dabuh, dabuh”, ”rrrrrr”, idoni tuan na roh ai ma. Iulakhon paopat halihon mabuk ma anggo Tuan Dolog Hararasan, ”Torbang” nini Tuan Dolog Hararasan, ”Patei” nini imbangni ai. Seng marhata horot bei, ”Dua horbou” nini Tuan Dolog Hararasan, ”Opat horbou” nini tuan na roh ai. ”Ualuh horbou”, nini Tuan Dolog Hararasan, ”Sapuluh onom horbou”, nini tuan na roh ai. Dabuh nini. Idabuh. Anggo na monang on, na monang ma hatahonkon, tapi anggo na talu, na talu ma hatahonkon, begu malah na talu tulang, hita manisia ma na monang, hutulakhon ma bamu ganup hamonangankin. Seng patut huboban in nini Ompung Dibata, sombahku bamu, andin ma ijin homai anturang, jalo nasiam ma sombahkon, i lobeini Naibata do hita marsahap on”, nai ma nini tuan ondi. Ai domma itulakhon sagala hamonanganni ondi, seng ra ia mamboban. Longang tumang do anggo Tuan Dolog Hararasan pakon sugara ai, mambogei hatani tuan na monang ai.

Jadi patarni use, ibunuh Tuan Dolog Hararasan ma horbou sada, dear ma iparmasak, anjaha ibahen sabangunan gonrang, gonang timur, anjaha ibahen ma ijin manortor anak boru, manortor pakon garama. Ibahen ma homai ijin na mandihar, tapi anggo tuan na roh on, ikawahkon so ikawahkon do parmaenan on haganup, botouni na masik ibayangan ondi do tong i bagas uhurni. Salpu ma parmaenan ondi. ”Naha do gakni Tulang?” nini tuan na roh ai, ”Boi do podas na pasoh parmaenan on?” ”Mase nai nimu lawei”, nini Tuan Dolog Hararasan. ”Tarolos au mulak hu Dolog Ilir”. ”Mase lang lawei, boi do”. “Tapi anggo nini uhurhu, anggo boi ibahen ham age sabulan on margonrang hita ijon halani megah ni uhurhu”. “On do Tulang, seng pala hulanglangi, anggo megah uhurni tongah, tapi anggo hanami maningon mulak ma sadari on. Tapi anggo holong ateimu, dong pangindoanku sada. Dong gan ijon sada jolma na masik i bayangan”. ”Ise goranni Lawei?” nini Tuan Dolog Hararasan. ”Goranni ai Tulang, dapot kabar do au, si Sormaliat goranni!” Jadi isuruh Tuan Dolog Hararasan ma jabolonni sahalak manorih na i bayangan ai i toruh ni losung ai, nini Tuan Dolog Hararasan ai ma: ”Ne ma ambia, torih ma tongon na i bayangan ondi, na tolu tahun ondi, atap na manggoluh opei ia, anggo manggoluh pe boan hanima ma ia. Lanjar sungkun ma goranni atap ise do”. Jadi laho ma tongon na mangayaki ai, anjaha irik ma ihatahon Tuan Dolog Hararasan hu bani tuan na roh ai: ”Ai benahamu ai Lawei? Jabolon-jabolon na masik i bayangan ai?”

Jadi marsampang ma tuan ai: ”Ou Tulang, sonon do dahkam, anggo rahasiani jolma, ambit ham pe, hanjon hujanan, maningon piara ham ma na masombuh, na mulak hun bayangan, pala dokah pardingatni dahkam, marhorja pe ia bujur, halani idingat sombuhni ai. Au pe nai do uhurhu, ase marosuh au mamake sada jolma na dob masombuh, nai ma”. Roh ma na manorih ondi use, ”Manggoluh opei i bagas, tapi domma irongkap hayu, ai tunasni bayanganni ai pe porini ibahen mambahen parkakas ni rumah, boi do jadi ulur”, nai ma nini na manorih ondi. Tapi anggo gonrang parmaenan ondi, tong do marhatai i alaman. Jadi lang tarhorom tuan ondi uhurni, halani siholni mangidah botouni ondi, ”Eta ma tongon ambia, ase dohot au manorih”, nini Tuan ai ma. Anggo Tuan Dolog Hararasan ipandang do tuan ai. ”Ou Lawei, benahamu torih-torihon ai, ai bau masik, ah pasoh ham malah”. Jadi marsampang ma tuan ai, ”Tulang, domma ibere ham bangku”. ”Ia hubere benahamu in, jabolon in malah buat ham”. ”Tapi domma huhatahon bamu nongkan Tulang, anggo au holi dahkam holi manangani ai mintor dokah pardingatni”. Jadi laho ma sidea, ampa na manorih nongkan, iboban sidea ma sada parang, managili tunas ni hayu ai, ase taridah na masik i bayangan ai. Jadi ididah tuhan ai ma tongon na masik i bayangan ai. Seng be songon rupani jolma, naseng botongku ondi, nini uhurni. Dob pe ididah dong sining, iatasni saliboni hampit siambilou, si naman partinandaan ase mangaku ia si Sormaliat do hape. Tapi i bagas uhurni do ai, anggo taridah hun darat lang, anjaha ia ma manangani bayangan ondi. Torus do mintor iboban hu bah, ia homai do namamurihi bogas ni bayangan ai i bah. Nini na masik i bayangan ai ma: ”Tuan nami, ulang bei itangani hita naheihin, na masik i bayangan do in”. ”Age sonai, ase madokah pardingatmu bangku, se ra do ge ho mangihutkon au?” nai ma nini tuan na roh ai. ”Harosuhni uhurhu ma ai tuan nami, hu ahap i bagas uhurhu, ambit lang hita roh Tuan nami, lalab masik i bayangan do au”. ”Nai ma da ambia, aima se ra ho ambia tambaranku, seng pala sonaha age hujolomi angkulamon, ase dokah pardingatmu bangku”. Jadi nini na masik i bayangan ondi ma, ”Bujur ni uhurmu do ai Tuan nami? Sabab domma marbau ganup angkulangkin, ampa ugahni naheingkin. Agendo ulang sasei bauni pakeanta in, ampa humbai angkulanta in, au na masik i bayangan on”. Anggo tuhan ondi, inunut do mangkatariluh sambil mamurihi na i bayangan ondi, anjah ihut marsuhap do ia, ase ulang ididah halak.

Jadi isuruh tuhan ai ma juak-juakni mangalop demban panurungi marlada, hu huta. Roh ma juak-juakni ialop ma demban panurungi na marlada ondi, iberehkon ma bani tuhan ai. Tuhan ai sandiri do mangkilhili demban panurungi ai, ibursikhon ma bani ugahni na masik i bayangan ai. Dob salpu iparidi anjaha ibuat homai ma pina-pina ni untei otik ampa horsik na i tondolanni pansur, na ulusni. Ipanpoholhon ma hubani naheini na hun bayangan ai, lanjar ibuat tuhan ai ma sada hiou na borsih, irigathon ma hiou ai, ai ma hiou lopak atap hiou putih, nini jabolon ai ma atap juak-juak ai ma, ”Benaha panrigaton na madear Tuan nami?” Nini tuhan ai ma: ”Sip ma hanima ambia, seng ibotoh hanima marsahap, seng ibotoh hanima na hubotoh, tapi anggo binotoh nima hubotoh do. Anggo binotohku seng botohon nima. Tongon-tongon do huhatahon on bani nasiam, handian pe seng ra mangihutkon au, anggo lang parlaho na madear hubahen humbani handian. On pe se madokah idingat bana holi au”. Saud ma ibalutkon (ililitkon) hiou ondi bani nahei na i bayangan ondi.

Dob ai iolos iboban ma hu huta, ipangindohon tuhan na roh ia ma marlegan rumah sidea, paima mulak hu hutani. Ipatuduhon Tuan Dolog Hararasan ma sada rumah, ai ma na margoran rumah Jambur Silopak, tapi huda do anggo i toruhni, ajakanni Tuan Dolog Hararasan do anggo huda ai, madear do anggo potonganni, kita homai do anggo mambobe, nini Tuan Dolog Hararasan ma: ”Ai jenges ni aha hita namin Laewi i lopou?” ”Ah, Tulang, buei sahapni jolma simbuei in, na marpantang do da Tulang age dalahi, na botoh ma anggo sahap tongah, dear ma au ijon Tulang, lang pala sonaha. Tapi dong otik pangindoanku bamu Tulang”. ”Aha do ai Lawei?” nini Tuan Dolog Hararasan ondi, ”Aha do gakni pangindoanmu ai?” ”Boras do namin ampa hudon etek-etek sada”. ”Benahamu ai Lawei?” nini Tuan Dolog Hararasan ondi. ”Agendo adong otik lintok-lintokon panganon ni na masik i bayangan on, ai domma hatilbogan ia, seng ongga be ipangan sipanganonni manisia i bagas na tolu tahun on”.

Roh ma Tuan Dolog Hararasan ondi, ”Aaah, urus-urusan ma in?” ”Tulang”, nini tuhan ondi, ”Lang idingat ham sahapku nantuari? Naha pe dahkam, anggo lobih na bahen anak diri, tontu banggal do pardingatni bandiri”. Jadi mulak ma Tuan Hararasan hu rumah bolon. Podas ma isuruh na manaruhkon boras opat tumba, dondang sada parompat angkalan. Anjaha ibere sada abal-abal, igoki garam, batil sada, sonduk, balbahul sada, tapongan, pinggan, samborik. Anjaha nasi panak boru do isuruh manaruhkon. Nini Tuan Hararasan ma humbani boruni ondi: “Boban ampa soban in angkora, mangikut sada jabolon”. Nini Tuan Dolog Hararasan ai ma homa: “Runting Bunga! Anjaha ho ma mardahan indahan in!” Jadi marsampang ma boruni ondi: ”Ai naha sahapmu ai ase sonai Bapa? Si Jambur Silopak podomanni dalahi do ai, au maila do huahap saor hujai”. “Seng sonai Inang”, nini bapani ai, “Boban hasomanmu dua atap tolu halak jabolon in. Ase hu patugah hu bam sonon do: Atap maniak boltokni tuan na roh ai, ai markaha do ho hujai da, ai lang tulang do nini hu bangku? Atap maniak boltokni arian, aha salahni mardahan ho? Anggo indahanni sogot ampa bodari lang ididah ho hun rumah bolon do?” “Halak on hape hujai Bapa, anggo au seng hujai”. “Age Inang ulang tahan hatangku!”

Jadi marhata ma puang bolon Dolog Hararasan, “Ranting Bunga, Ranting Bunga, ulang ma Inang itahan ho hatani bapanta, idah ma parholong ni tuhan ai, siborei-boreini in banta domma targadei tanoh on pakon lopou on, sonai age sagala arta haganup, ai lang domma itulakhon haganup bani bapanta? Jolma na laingan tumang do anggo tuhan ai huahap. Atek huja pe ho laho Inang, seng dapot be sonin jengesni uhurni jolma, rupa homa dong do”. “Nai pe nimu Inang seng hubotoh mambalosi sahapmu ai”.

Dob konsi ai itaruhkon sidea ma hudon dondang ai pakon boras ai, bani hohoman ni tuhan ai niboban ni sidea ai. Anggo mardahan seng ra sidea ijai.

Mulak ma sidea hu rumah bolon, lanjar iunung-unung puang bolon ondi ma boruni ondi anjaha ibere sidea pangajar-ajari golang harinsungan, buah bamban, sinongkok. Idobni saud ma tarjauk hata panak boru ai, ai seng tartahansi be hata ni bapani pakon hata ni inangni, nai age hade-hade i bagas na dua arian dua borngin, langkah ni panak boru ai do isahapkon sidea.

Tapi anggo tuan na roh ondi dengan ibotoh parsahapan ai. Anggo parmaenan pakonni gonrang ondi marsaran ma homa. Jadi ni use, dob konsi martomu parsahapan ai, idilou Tuan Dolog Hararasan ma gamotni patomu parsahapan ondi, bani tuhan na roh ondi. Nini ma: ”Tuan nami”, ibahen ma hata limbaga, ”Naha do gatni, ai lang patut do nihaholongan na marholong ni uhur? Atap binerei na ra mambere?” ”Patur do”, nini tuhan ai. ”Non do Tuan nami”, nini gamot ai, ”Domma holong ateinta bennami i Dolog Hararasan on, domma ijalo hanami siborei-boreita, humbani gok ni uhurta, jalo hita ma homai siborei-borei nami humbani gokni uhur nami, nai ma hata huboban hun lopou, nai ma Tuan nami”. Marsampang ma use tuhan na roh ondi: ”Aha ma gakni siborei-borei nasiam ai?” Laho ma hita hu lopou Tuan nami, i lopou ma hita sahapkon taringat siboreion nami ai bani Tongah in”. Jadi laho ma sidea hu lopou.

Dob konsi i lopou sidea, roh ma hun rumah bolon, puang pakon ni puang binuat ni gamot, nai ge panak boru Runting Bunga anjaha mamboban hiou sanlambar. Dob ai iberehon puang binuat ni gamot ondi ma sada demban tasakan bani tuan na roh in, anjaha ihut ma puang bolon mansambeihon hiou, nini ma: ”On ma hela, hiouhu hubamu paombahkon dakdanak on ai ma si Runting Bunga on, agendo podah-podahan ni hela songon na mangamparhon apei ampa mamurihi partijuran, ia das holi ham i hutamu, boban ma ia hujai mambahen podah-podahanmu, ase ibotoh marpangabak na madear, marparlahouan na umum, dompak hita puang, nai ge hasoman jolma. Atap sonaha holi hurang ni parlahouni, hurang ni parsahapni, ulang gulut uhurni hela, ipodahi hela lah ni on”, nai ma nini puang bolon ondi.

Dob konsi ai songon na longang tumang ma uhur ni tuhan ondi mambogei hata ai. Dokah ma ia marpingkir. Nini puang bolon ai ma use: ”Mase sip ham bapa, lang isampang ham hatangkai? Naha pe anggo hiou in biar pe na masambor in na majenges ma, parombah ni dakdanak on ma ai bamu, ase ulang lupa ham arian ampa borngin mangajarho ajar andohar jolma na madear ia, lang pala marhutuk au bamu, asal malah boban ham ia siamparhon apoei i rumahmu ai!” nai ma nini puang bolon ondi.

Dob konsi ai dokah-dokahni marsampang ma tuhan ai, nini ma: ”Anturang, ampa nasiam Tulang, habang namin kaluhui, sumorbei-sorbei, lape sampang bangkuang, marimbas hordong langgei, malas namin uhur manjalo siborei-borei, parsampang mando na hurang, marimbang holong ni atei”, nai ma nini tuhan ondi. Marsampang ma Tuan Dolog Hararasan, ”Ou Lawei, seng pala bahennonmu marhata pantun atap marhata limbaga bani anturangmu, seng sonai halak, bolkas-bolkas gelah ma baen. Na ra do ho mangajari anggimu in? Anggo ningku sai ajaranmu ma ia, boban ma ia, pa ganjang-ganjang, ia na hurang uhur pe, ajari ma maruhur”. Jadi nini tuhan ai ma: ”Ai ra lang ra au Tulang?” Jadi tartawa be ma sidea na hundul in. Jadi marpunsa ma parsahapan ai. Itangga sidea ma ari laho mulak. ”Antigan ma gakni nasiam mulak hela?” Jadi nini tuhan ai ma: ”Patar ma hanami mulak”. ”Dear do”, nini tulangni anjaha ipasirsir sidea ma parpaingkatni bani panak boru ai. Satangga horbou, satangga lombu, satangga hambing, ipaingkat ma homai puang lima; sibobanan ni puang lima ai sinjata bodil pakon podang. Ia sibobanon ni panak boru, boras ma.

Jumpah ari patarni use, meser ma sidea, anjaha iirikhon jolma simbuei, anjaha mariah ma sorani bodil, namanaruhkon panak boru ondi pakon tuhan ondi. Tapi anggo na hu bayangan ondi, i atas huda do anjaha ibahen do hiou lapikni anjaha ipayungi do homani. Songon na tarlongang do uhurni halak manonggor, halani harga ni jolma na hu bayangan ai.

Lang ope hira-hira jumpah parsaranan gati-gati do marsaran, songon na mamberehon sipanganon hubani na hu bayangan ai, ampa manambari tuhan ondi sandari do mardas tangan, seng ilopas jabolonni. Jumpah parbornginan, marborngin ma sidea, hun lobei do iborei mangan na maluah hun bayangan ondi, seng ra ia nainei hun lobei mangan, nini do: ”Sintabi Tuan nami, seng patut au hun lobei mangan, hita do patut hun lobei mangan, rima-rima ni hita puang do sijaloonku”. Lang ibotoh tuhan ondi be panarianni mambogei hata ai. Ihatahon tuhan ondi ma: ”Pangan ma ambia, seng pala sonaha”. Jadi ipangan na hun bayangan ondi ma tongon indahan ai, morot-orot do ia mambondut, ai seng ongga pe ipangan nansain dokahni indahan ni manisia. ”Inum bah in ambia”, nini tuhan ondi. Iinum pe bah ondi tong do songon na mongkik-onkik mamondut indahan ai. Ai domma etek tolonanni seng ongga ibolus sipanganan i bagas na tolu tahun. Itorih tuhan ai ma bana sanggah na mangan ai, anjaha mangkatariluh ma tuhan ai, na mangidah bana namorot-orot ai, anjaha seng tarolomsi be sua tariluh. ”Age nanget-nanget ambia pangan indahan in, miduk do ambia”, nini tuhan ai. ”Naha ma hubaen Tuan nami, seng tarbondut au, bah onpe gari seng tarbondut au, ibotoh hita ma seng ongga hupangan ai, roh etekni do tolonanku”, nai ma nini na maluah hun bayangan ai. Lanjar ipaunduk tuhan ai ma uluni, anjaha lanjar ibuat ma gotongni mangapusi iluhni sambil ihatahon bani hasomanni: ”Ah, bajan ni timus in alo! Maniak matangkon”. Ai butong do matani tuhan ai na paidah-idah na maluah hun banyangan ondi.

Patarni use das ma sidea i parbornginan, ipaturei-turei ma tong na maluah hun bayangan ondi. Das do sidea dua puluh borngin i dalan, halani nanget-nanget do sidea mardalan, anggo namin das ma ompat borngin dalanansa, malum ma jolma simbuei, dob-dob marsaran, halani ai do ase pala dua puluh borngin.

Kira-kira tongah ari, das ma sidea i Parpandanan na Bolag, das ma i horbangan, mintor ibuka parari ondi ma horbangan ondi, anjaha tarbotoh ma panroh ni sidea ai, dong ma napatugahkon hu rumah bolon, roh puang bolon ampa panak boru Nadorhaya di Ari sonai age rayat ganupan. Sonai age Tuan Rahat di Panei mandapothon hu horbangan ai homa. Mintor itang-tangi panak boru Nandorhaya di Bulan ondi ma pakeanni ondi, mulak ma ia use pakean naboru, mintor roh ma Tuan Sormaliat ondi, ai ma na maluah hun bayangan ondi, mintor idorah ma botouni ondi janah tangis ma ia, nini ma: ”Ou Nandorhaya di Bulan, botoungku, ambit lang ham, matei i bayangan do au saud”, nai ma partangis ni Tuan Sormaliat ondi, nai homa panak boru Nandorhaya di Ari, tangis ma homa ia, isanggou ma homa Tuan Sormaliat, sonai homa jolma rayat simbuei, seng dong na so tangis, tangis do haganupan. Nini panak boru Nandorhaya di Bulan ma homa: ”Ou Bapa Anggi, aha ma salah nami bamu, mintor sonai ma hape pambahenanmu bai iboto na suman na sada simanrung”.

Tapi anggo panak boru Runting Bunga seng marhata. Masuk longang tumang do ia bani na tarjadi ai, ai seng pangarapanni uhurni dong sonai, hape sonai.

Salpu na tangis ondi sidea haganupan, marhata ma Tuan Rahat di Panei: ”Ulang dokahtu i horbangan on, hu rumah ma gelah”. Jadi iboan sidea ma hu rumah Tuan Sormaliat ondi, tapi anggo panak boru Runting Bunga mandolei do i alaman. ”Naha pe sisahapkonon, i rumah malah”, mangojur ma jolma simbuei, jadi dihut ma ia hu rumah bolon. Ihut homa ma ampa Tuan Rahat di Panei. Marsahapi ma jolma simbuei na dohor tuturni hu tongah, taringat bani pangarapan ni Tuan Sormaliat ai, jadi marhata ma Tuan Rahat di Panei nini ma: ”Aha do deba sisahapkononta? Seng pala paganjang-ganjangon sahap”.

Jadi sip ma hasoman haganup ibahen saor biarni hasoman haganup hubani Tuan Anggi ai. Roh use Tuan Rahat di Panei menurdukhon bajudni bani Tuan Sormaliat sambil mambahen podah, nini ma: ”Ou Sormaliat, na dembankon ambia, ulang pala magulut uhurmu, malungun ateimu, anggo seng iandung ho namaborit lobei seng boi irajai ho hanami haganupan, ai au pe bapa, na dob huandung do i harangan Sihatunggalan, i harangan Sihatunggeian, i buntu pangainan, i dolog panangkolan, siah taun dokahni manghopkop kaha, nai ge ijin do kaha, ge sungkun!” ”Tongon do” nini puang bolon ondi. Dob ai mardearma sidea.

Jumpah ma ari patarni, buei ma halak na roh, parhuta na daoh nai ge parhuta na dohor, mamboan panjujungini bani Tuan Sormaliat.