Bani lawang-lawang ni ari, sihol ma-ompo ma Tuan Sormaliat, itorih ma hata-hatani pangidahan, maningon mangulaki boru tondong ase madear. Salpu ai laho ma ia bani puang bolon ondi nini ma: “Ou inang, natorih pangidahan narian, ningon naulaki do boru tondong ase madear”. Jadi marbalos ma inangni ai: “Ai bapa, seng adong boru tondongmu”, nai do hansa balos ni inangni ai. Mulak ma ia use.
Ilabang-labangni ari use mangojur ma halak ganup maningon mompo ma Tuan Sormaliat soani ge hatani gamot, ase adong na mangurupi tanganni puang bolon. Laho ma use Tuan Sormaliat manungkun bani inangni ondi, nini ma: “Inang, mangojur do rayat ni huta on pakonni gamot huta on, maningon mambuat boru do gan ahu, ase dong mangurupi tanganmu”. Ibalosi inangni ondi ma: “Bapa, ririd hanima ma huhuta na legan in”. Ini anakni ondi ma use: “Sonon do inang, nini uhurhu maningon badanmu na hundul i rumah on atap idia ham matua, anggo seng boru tondong ai hundul i rumah on naha ma gakni panarianni gamot huta on ampa rayat huta on? Ambit uhurhu pe seng madear be anggo halak hundul i rumah on”. Marsampang ma inangni ondi: “Ai bapa, na matektek hun langit do au, na pultak hubani bonani buluh, nasongon anak-anakni polang, naso marbona marujung”. Lanjar do tene iporsou puang bolon ondi seng ia martondong. Sonon do nini uhurni ibagas: ibahen daoh ni huta bani tondongni i hapoltakan, dua bintang i dalan tongon mambahen dalansi, ia mate holi tene bayu ahu, seng ididah tunas, seng ididah bayu au. Nai do hape panariannu ase lalap iporsou hutani tondongni.
Dob konsi ai, ilabang-labangni ari use, dob ma kira-kira satahun dop lopus, roh ma sada guru partandang, Guru Langgam Banua do goranni. Hunjai ni Silindung, hun Tanoh Batang Toru itoruhni gorat na tolu. Dapot do ibahen mardaras mardorus bulung ni torop, salih manjadi begu. Mabiarma partalun pakonni amang pardusun. Das ma ia dohorhon Parpandanan na Bolag, jumpahsi ma ijai amang pardusun, nini guru ai ma: “Ou amang pardusun, hunja dalan on laho hu Parpadanan na Bolag?” nai ma nini Guru Langgam Banua ondi. Marsampang ma pardusun ondi: “Ou amang umbei-umbei, parja do lai ham?” Marsampang homai ma guru ondi: “Ou amang pardusun, ulang ihatahon ham au amang umbei-umbei, dong lai goranku, Guru Langgam Banua Holing, hunjai ni Silindung anggo au, hun Tanoh Batang Toru, jayu silopak ulu, dapot do hubahen mardaras-mardorus bulungni torop salih menjadi begu”. Mabiar ma amang pardusun ondi. Ituduhonma dalan ondi dompak Parpandanan na Bolag. Tapi anggo beguni ondi tongon mangihut do ia odor, dong tolupuluh bilanganni, tapi bulungni torop do namin, ai sunglap do ai, seng begu na tongon.
Das i horbangan dong ma sada i horbangan sada balei pararian. Humbagasni partoguh, anggo horbangan ai na marlayar-layarhon bosi do na marpangunsiankon perak na manrahutkon tombaga holing. Anjaha bosi homa do partoguh ni huta ai kaliling. Ompat do horbangan ai, sada horbangan huluan, sada horbangan kahean, sada horbangan dalan bah, sada horbangan dalan juma. Hun horbangan kahean ma parrohni Guru Langgam Banua ondi. Nini guru ondi ma: “Ou amang, ou amang parari ou, buha ham ma horbangan on!” Marbalos ma amang parari ondi humbagas balei pararian: “Ou amang umbei-umbei, parja do lai ham?” Nini Guru Langgam Banua ondi ma hundarat ni partoguh ai: “Ou parari ou, ulang ihatahon ham au amang umbei-umbei, ai dong lai goranku, Guru Langgam Banua Holing, dapot do hubahen mardaras mardorus bulung ni torop salih manjadi begu!” Dop ai ihatahon amang parari ondi ma use: “Ou amang umbei-umbei, ulang ma ihatahon ham hatani haguruan, sada Guru Gumbak na Bolon huta on do hansa guru. Dapot do sapuluh ibahen ponggei marsisorean, hilap marsigatgatan, i nagori Bondailing i talunni musuhta”, nai ma nini amang parari ondi, humbagas ni partoguh. Marsampang homai ma Guru Langgam Banua Holing, nini ma: “Seng hulanglangi dong habotohanni Guru Gumbak na Bolon huta on, anggo ia sobotohan au lai mangguru, anggo au sibotohan ia lai mangguru”, nai ma nini guru ondi hun daratni partoguh. Dobkonsi ai, laho ma amang parari ondi patugahkon hu lopou bani partongah. Anggo partongah i surambih lopou do dapotsi. Ipatugah ma bani tongah ai, “Tuan nami, dong ijon guru partandang, Guru Langgam Banua nini goranni, dapot do nini ibahen mardaras mardorus bulung ni torop salih manjadi begu”. Dob ai idilo Tuan Sormaliat ondi ma juak-juakni ondi aima si Girsang Doriangin, ninima: “Ou Girsang Doriangin, na ma tongon ambia, dong gan i darat ai jolma na mubah, torihma tongon, rup hanima ampa parari on”. Laho ma sidea tongon, mandapotkon horbangan ondi, marhata ma amang parari ondi: “Ou amang umbei-umbei”, nini ma, “Ulang ma ihatahon ham hatani haguruon, sada Guru Gumbak na Bolon do hansa i tanoh on, dapot do ibahen ponggei marsisorohan, hilap marsigatgatan i talun ni musuhta”. Marsampang ma guru ondi, “Ou amang tua-tua, amang tuhe-tuhe, parlisa nansa solu, parulos na silbak-silbak, ulang ningku ihatahon ham au amang umbei-umbei, dong do ningku goranku, Guru Langgam Banua, na martandangkon haguruon, hu tanoh Parpadanan na Bolag on. Dapot hubahen mardaras mardaris bulung ni torop salih manjadi begu”. Marsampang ma si Girsang Doriangin: “Ou amang Guru Langgam Banua, ulang ma ihatahon ham hatani haguruon, sada Guru Gumbak na Bolon huta on do hansa guru i tanoh on. Torih ham balei ganjang Sihampilis ai, domma tumbuk tolungkaliat ulu-ulu ni guru partandang hanji hujai ondi, sada pe lang na mulak”, ai ma nini si Girsang Doriangin ondi humbagas ni partoguh. Marsampang ma Guru Langgam Banua ondi: “Anggo do tuannami, ijin tanoh mangindou, ijin do naborei, atap logoh simada hosah, tanoh simada badan, puang simada ringgit, lanog mando na tangis, porkis mando marusung nai pe nasuhuni!” nai ma nini hundarat ni partoguh. Jadi marsampang ma si Girsang Doriangin ondi, nini ma: “Ou Guru Langgam Banua, ulang ham martuannami bangku, si Girsang Doriangin do goranku, juak-juakni puang maharga”. Dob konsi ai lao ia patugahkon hu lopou bani Tuan Sormaliat, nini ma: “Tuan nami, naha do tongon guru ai, sipalopuson do ia huhuta? Domma huruduhkon tuan nami, sagala ulu-ulu na gantung i balei ganjang sihampilis ai, ulu-uluni guru partandang ma ai, nai ma ningku patugahkon bani, sada pe lang na mulak hanjia hanjai ondi, nai ma ningku. Seng huahap ipardulini ai”. Jadi marsampang ma Tuan Sormaliat ondi: “Nema ambia, hatahon ma anggo tongon do ia guru, ulang tastas partoguh ulang buha layar-layar, tiba ma ia i huta”. Jadi ihatahon si Girsang Doringain ondi ma tongon hata ai hubani guru ai. Dob ai marsampang ma guru ai hun darat ni partoguh: “Ou Girsang Doriangin, juak-juak marharga, ibagas ma langgu ni parang, i darat ma langgei ni tangkei”; jadi ipungpung ma hiouni, iambalhon ma huhuta, satiba das hiouni ondi i huta, das ma ia i huta. Lanjar idapothon ma Tuan Sormaliat ondi hu lopou, tapi jumpahsi i surambi lopou do. Lanjar ipahundul ma ijai. Mabiarma Tuan Sormaliat, mintor iungkupi ma demban, isurdukhon ma bai guru ondi. Seng ta manangkap guru ondi, non do nini: “Santabi bani tuan nami, mabiar do au manangkap tasakanni hita puang, lang huantan demban, lang huantan gambir, timbaho ampa hapur sonai age pining. Anggo holong ateita puang, bajud ni hita puang surdukhon bangku”. Jadi marhata ma Tuan Sormaliat ondi nini ma: “Ou Girsang Doriangin, alop ma bajudkai hu lopou, goki demban i bagas, timbahou ampa hapur, gambir ampa pining”. Laho ma tongon si Girsang Doriangin mangalap bajud banggal ondi, igoki ma demban i bagas, gambir ampa pining, timbahou ampa hapur. Isurdukhon bani guru ondi bajud ai, jadi itangkap guru ai ma bajud ondi, nini ma: “Sintabi tuan nami, ia lang huhatahon hatani gambir pining, timbahou ampa hapur, ihatahon hita puang ma gakni songon ginagat ni hambing songon binondut ni spidora, isini bajudni hita puang. Ia huhatahon holi, na idia pe lang na tontang”, ai ma nini Guru Langgam Banua ondi. Marbalos ma Tuan Sormaliat: “Hatahon ham ma guru!” Jadi ihatahon guru ondi ma, nini ma: “Talaktak ni sihotang do hita tuan nami, andor sihadupia, tartawa do hita i hatoroban tuan nami, tangis i hapudian. Hanjai hunjai ondi na boi do marsikta tuan nami” nai ma nini panobut ni Guru Langgam Banua ondi andompak Tuan Sormaliat. Jadi itailihon ma hu atas, matektek ma iluhni hansa buahni lada, anjaha lahou ma ia hu lopou, nini ma: “Ou Girsang Doriangin, arahkon guru in hu lopou ambia”, lanjar ipapodom tuan ai ma, tangkop bana modom. Manjalir ma iluhni i lagei-lagei podoman.
Dob konsi, rohma puang bolon, hun rumah bolon laho hu parsolopan, domma iboban bonang. Mangkawah ia dompak paratas bolag, domma tangkop anakni ondi modom, anjaha nini ma: “Mase sonin parpodommu Sormaliat?” Seng ra anakni ondi mambalosi, nini si Girsang Doriangin ma: “Ibahen na roh do nongkan guru on lai”. Jadi tarhinjat ma ia, mintor ipahundul ma i lambungni anakni ondi. Itugat na hona aji, anjaha ipatangkas ma: “Naha do tongon bona ni ai, ase modom ho bapa?” Jadi marhusorma anakni ondi, anjaha ipahundul ma, tapi dob ma marsuap-suap iluhni. Jadi marhata ma puang bolon ai: “Mase tangis ho bapa? Ai dihamu maborit?” Jadi marsampang Guru Langgam Banua: “Ulang hita lai rusak puang bolon, sedo na mahua anggo anak”. Mintor marhata ma puang bolon ondi: “Ai na sonaha do bapa?” “Seng sonaha”, nini guru ondi. Jadi lanjar ibere puang bolon ondi ma demban tasakan hubani guru ai. Nini guru ondi ma: “Mabiar do au manangkap tasakan ni hita puang, anggo holong ateita, bajudni hita puanglah surdukhon hita bangku. Lang huantan demban, timbahou ampa hapur, gambir ampa pining”. Roh ma puang bolon ondi idilo ma panak boru Nandorhaya di Bulan: “Ou Nandorhaya di Bulan, boban ma bajudkin hu lopou on, goki demban i bagas, sonai ampa timbahou, nai age pining, hapur ampa gambir”. Igoki panak boru ondi ma tongon, itaruhkon ma hu lopou, iberehkon ma bani guru ai. Dob konsi das bani guru ai, nansai buei ni demban i bagas sandaup do ibahen, nansai buei ni pining i bagas, sandaup do ibahen, timbahou ampa hapur sandaup do ibahen. Dob konsi ai, lumei ma isi ni bajud ai, marhata ma guru ai andompak puang bolon ai, nini ma: “Sintabi lai puang bolon, ialang huhatahon holi, hatani gambir pining, timbahou ampa hapur, ihatahon hita ma gakni holi songon binondutni sapidora isi ni bajud ta puang. Ia huhatahon holi, na idia pe lang na tontang, na idia pe matontang ma”. “Jadi hatahon hamma guru”, nini puang bolon ai. Ihatahon guru ai ma tongon nini ma: “Taraktak ni sihotang do andor sihudappia, tartawa i hatoroban do tangis i hapudian tuan huta on, nansa in dokahni ari, nansa in dokahni borngin, humbanta do lai pusokni uhurni anak”. Marsampang ma puang bolon ondi: “Ai, tongon do bapa, tongon ma ham guru, siharhari namapoltik ma ham tongon, sipalunggar na mapusok. Ondo hansa sada guru nami, sipatugahonku bamu, sihol mompo ia, boru tulangni nini. Anggo au bapa, satongon ni do na songon anak-anak ni polang do ahu, na so marbona marujung, ningku do hu bana, ambit marbollou namin pahu, mardulang namin hordong, ambit marbotou namin au, martulang namin ho do. Pahu pe lang marbollou, hordong pe lang mardulang, nai do ningku bai anakta on”. Jadi marsampang ma guru ondi use: “Sonaha pe lai puang bolon, anggo lang ipabungbung hita uhurni tuan huta on, roh tomosni do naboritna in holi. Non do lai, anggo boritni badan dapot do natambari, anggo boritni paruhuran, mamaol tambaransi”. Jadi marsampang ma puang bolon ondi: “Naha ma gakni nabahen bapa? Ham ma hansa na pandei, na manringringi ai ganup. Antong sapala dob ma ham roh hunjon, holong ma uhurmu, nai ma nini puang bolon ondi.
Dob konsi ai jumpah ma bodari ni, marsahap padua-dua ma Tuan Sormaliat ondi pakon Guru Langgam Banua. Nini Guru Langgam Banua ma: “Atap na mamorsou do tuan nami puang bolon huta on, laho ma hita hu bah patar, pasirsir hita ma pulungan bangku”. “Aha ma sibuaton pulungan ai guru”, nini Tuan Sormaliat ondi. Ipatugah guru ai ma pulungan, ai ma untei sipitu saragunan, huningna marbunga sada, mangkuk putih sada, hiou putih saparulosan.
Jumpah ma patarni lahoma sidea hu bah, sanggah tongah arian matani ari, ibolah guru ondi ma untei ondi, sada bolah pitu, dua bolah lima, tolu bolah tolu, sada mapagari dirina. Dob ai ipisatma hu mangkuk putih ondi. Isorlomhon guru ondi ma hubani pangurason ondi Tuan Sormaliat anjaha itudungkon ma hiou putih, ididah Tuan Sormaliat ondi ma ibagas pangurason ondi, dong sada anak boru majenges i atas pantangan sipitu sundut, jambulan sangkahorlei homani.
Paspas baliga hodong nansa untei puraga hulhulanni. Nini Tuan Sormaliat ma: “Dong huidah guru anak boru majenges sada martonun i atas pantangan sipitu sundut. Jambulanni sangkahorlei paspas baliga hodong nansa untei puraga hulhulanni”. Jadi marhata ma guru ondi nini ma: “Ai mada tuan nami, boru tulangta ia ma ai”. Jadi marsampang ma use Tuan Sormaliat ondi: “Naha gakni bahen hita ai guru? Mambuat ai ase dapot hita? Anggo inang iporsou do seng dong nini tondongni”. Jadi marsahap ma guru ondi use: “Bahen hita sada partahian tuan nami”. “Naha ma partahian guru?” nini tuan ondi. “Anggo ra do hita mangihutkon, boi do hubahen puang bolon huta on”. “Ra do au manurut”, nini tuan on. “Atur ham ma sonaha gakni ase mangaku inang”. Jadi manriah ma sidea, guru ai ampa tuan ai. Dong ma riah sidea padua-dua sonon: Maningon papulungon ma ganup gamot ampa pangulu dusun. Jadi dob ai mulak ma sidea hu huta.
Jumpah ari patarni use, isuruh ma manggual ogung sitandol i balei ganjang sihampilis, jadi laho ma si Girsang Doriangin manggual ogung sitandol ai. Roh ma ganup sagala rayat pakonni gamot, nai ge pangulu dusun. Manungkun ma pangulu dusun ondi, nini ma: “Songon marhata ogung sitandol, sadari nantuari padua arian nongkan, o Girsang Doriangin, marsampang ma si Girsang Doriangin: “Dong do riahkononni tuan huta on, marhiteihonni panrohni Guru Langgam Banua, nini ma: Dong sada pangidahan i tongah on, pasal na laho mambuat boru tuan huta on. Jadi na legan na tarsobut bani pangidahan ai, musu do gan na laho roh hu huta on, alani ai manjaga ma hita, baen hita ma harungguanta, ulang pala dokah-dokah”. Jadi ibahen nasida ma tongon harungguan ai, manrunggu ma nasida. Dong sada tanoh kalimisan kira-kira satongah ari mardalan humbani Parpandanan na Bolag. Ipantom sidea ma horbou dua, ibuat Guru Langgam Banua ma darohni kira-kira dua baluhat. Jadi ipainumhom ma bani Tuan Sormaliat darohni horbou ondi naso binotohni halak. Dob salpu ai mangan ma ganup simbuei, mangan ma pakon gamot pangulu dusun, ibani barung-barung ai. Dob salpu mangan ai morong-orong ma Tuan Sormaliat, ihatahon ma maborit boltokni pakon tolonanni, mutah ma ia homa, mangutahkon daroh. Roh ma gamot ai ibereh ma tambar lambin mutah homai, sonai homa jolma simbuei marsibahen pambotohni na mambahen tambar ai. Iberehon ma, iinum Tuan Sormaliat ondi, lambin marompot do ia mutah, marsampak-sampak do darohni ondi, bajan tumang do tonggoron parayap-ayap ni daroh ai. Domma marbah ulosni pangulu dusun ai na manrambei ai ibahen daroh ai, anjaha laho ma napatugahkon hu Parpandanan na Bolag. Roh ma puang bolon pakon panak boru Nandorhaya di Bulan, sonai age Guru Gumbak na Bolon, gaya-guyu ma ganup hinorhon ni pangahapni tuan ai, ai lambin songon na galei do angkulani, anjaha lambin marhata pe lang be. Kosahna mando dong otik mulbak-ulbak. Das ma ijai puang bolon pakon Guru Gumbak na Bolon do namin tawar pangabang-abang tawar pangubung-ubung, roh dorasni do iahap tuan ai. Tangis ma panak boru Nandorhaya di Bulan, tangis homa ma puang bolon ai, nini ma: “Ou mangkela, Guru Gumbak na Bolon, tawari ham ma ibotongkon”. Marsampang ma Guru Gumbak na Bolon: “Domma hutama nian panakboru tambar, siada tua mangasi, ia lang mangasi sondia ma hubahen”. Jadi marhata ma homai puang bolon ondi bani Guru Langgam Banua: “Ou Guru Langgam Banua, aha do otik iboto ham tambar? Tambari ham ma otik tunaskon”, nini puang bolon ondi. “Buat ma bangku pulung-pulungan, bah dua garigit”. Jadi ipaturei ma tongon ansubah etek-etek dua, ibahen ma hubagas bah, jadi itabasi Guru Langgam Banua ma ansubah na etek-etek ondi, anjaha ipainumkon, songon na mangulbak ma otik na boritan ai. Iulakhon padua halihon, itabasi ansubah ai, dob ai ipainumhon use, lambin songon na mangorong ma tuan ai. Nini panak boru Nandorhaya di Bulan ma: “Gogohkon ham ma guru tambar in, songon na lambin manggoluh do hape botouhin”. Jadi marsampangma Guru Langgam Banua: “Puang bolon huta on do hansa na pagoluhkon tuan on, anggo manggoluh nini manggoluh do. Puang bolon huta on do hansa na papurpur na mahodog palunggar na pusok.”
Jadi songon na tarhototos ma use Tuan Sormaliat ondi tonggoron. Dob ai isobut Guru Langgam Banua ma: “Naha ma, matei ma tuan on anggo lang adong ipapuas hita na pusok i bagas uhurni ai”. Roh ma puang bolon ondi halani harga ni uhurni, ipaluarma rahasiana na botul, nini ma: “Tongon do guru, dong do boru tondongku, ai ma i Padang Rapuhan, si Rongga Huning do goranni. Panak boru Nansaduk di Hataran i tanoh hapoltakan” nai ma nini puang bolon ondi, lanjar isuruh ma panak boru Nandorhaya di Bulan mangalop tabung niuhir, ai ma na marlatap omas, inganan ni tintin na marmata payung na pinaingkat ni Tuan Padang Rapuhan ondi. Jadi iberehon puang bolon ai ma tintin ondi bani Guru Langgam Banua, nini ma: “On ma guru partinandaan”, isorlamhon andompak hapoltakan, “Tor ididah ham do holi boru tondongkuai”. Itangkap guru ai ma tintin ai ondi. Jadi iberehkonma hubani Tuan Sormaliat, ipatopat ma hundul Tuan Sormaliat ai anjaha ma iburihi ma ganup mata ni ampa badanni ai, iburihi ma daroh na marsuap-suap ondi. Jadi iparsorlamhon ma hubani Tuan Sormaliat tintin ai andompak hapoltakan, ididah ma tongon boru na majenges i atas pantangan ai pitu sundut, ididah homai ma jambulan sangkahorlei paspas baliga hodong nansa untei puraga hulhulanni. “Ai ma boru tondongmin bapa”, nai ma nini puang bolon ondi, mintor totap ma hundul Tuan Sormaliat, anjaha mintor dear ma marsahapi. Ai sedo tene naborit na botul naboritni ai, sipakulah-kulah do ai. Ai daroh ni horbou na niinum ni ondi do na nipangutahkon ni ai. Panarianna tumang do hansa boritan halani pamorsou ni puang bolon ondi nansain dokahni. Itopoti puang bolon ai ma homa: “Tongon do bapa huporsou do nasain dokahni, halani huahapkon das hinamarsikmu pambaenni bapa anggimondi, domma ho humbayangan, domma ho mulak humbaba ni begu, domma mulak hun Batang Toru, anjaha sonai homa hun babah ni darih, marhalahonni marsikmu ai bapa, sai ulang be ho mardalan na daoh nini uhurhu. Matei holi bayu ahu nini uhurhu, lang be ididah tunas; matei holi tunas, lang be ididah bayu ahu, nai do ge nini botouni on. Ai boi ma marsikni botoumon da bapa, namangayaki ham hambayangan, ambit ulang do gakni halani Nandorhaya di Bulan, ai lang masik i bayangan do ham?” nai ma dobni parsahapan ai. Jadi marhata ma Guru Langgam Banua Holing: “Anggo pasal daohni ai do lai puang bolon, seng pala ganggang Tuan Sormaliat on hun lambungta, nabuat jolma na songon parjongjongni, na songon rupani, ia na suruh martondur”. Jadi marsampangma puang bolon ondi: “Anggo sonai do guru nami, anggo dong do ibotoh ham sonai, dear ma ai; laho ma hita hu huta”.
Mulak ma tongon sidea hu huta haganup, sonai age pangulu dusun, sonai age jolma sinbuei, mulak be ma sidea hu Parpandanan na Bolag. Jumpah use ari patarni manriah ma Guru Langgam Banua pakonni si Girsang Doriangin ai ma juak-juak marharga agendo isari na songon rupani Tuan Sormaliat. Rup ma ia pakon Guru Langgam Banua mansari jolma na songon rupani Tuan Sormaliat ai. Seng dong jumpah selainni dong sada pangaldung sihanlung botabota, siultopkon bulu lagi, ai ma na margoran si Tahal Tabu. Tapi parnagori na legan do ai. Nini Guru Langgam Banua ma: “Ou Pangaldung, hanlung bota-bota, ultopkon bulu lagi, sonaha do paraturanmu tiga-tigamin? atap parboniagaanmu in”. Nini pangaldung ma: “Ale raja hami, tading-tading halak lopas tinjou do, tading-tading halasan”. “Naha aturan nidokmin ambia, seng ibotoh hanami”, sonai ma sampang ni Guru Langgam Banua ondi. Marsampang ma use pangaldung ondi: “Sonon do raja nami, ia dua bonana, mulak tolu; jadi sada ma nuan ujung na ai, ai ma na tigatigaonkon”. Jadi marsampang ma Tuan Sormaliat: “Ia hubaen bona ni boniagamu dua, jadi mulak lima ai lang adong ma ia tolu bunga-bunga ni tiga-tigamin?” Jadi marsampang ma pangaldung ondi: “Ambit dong in ompung, toho ma i”. Jadi putus ma parsahapan ai laho ma sidea hu huta. Iboban sidea ma tongon pangaldung in.
Das ma sidea i Parpandanan na Bolag. Ipakei ma songon pakeanni Tuan Sormaliat. Iajar Tuan Sormaliat ma mandihar manarunei nai age manortor, nai age haguruon ampa na legan-legan. Dos ma pambotohni sidea anjaha dos homai rupani sidea.
Tidak ada komentar:
Posting Komentar