Bani sada panorang ipalu ma ogung sitandol balei Ganjang Sihampilis. Si Ransah Ulu Balang Kasian do na mamalu ai. Roh ma panggamot, Pangulu Dusun hu balei ai, manungkun si Ranseh Ulu Balang Kasian, nini ma : ‘O Ransah Ulu Balang, Ulu Balang Kasian, songon na marhata ambis ogung sitandol sadari nantuari padua arian nongkan, sedo adong mara i Pamatang huta on ? Aha do gakni pamukulonkon bani ogung sitandol ?’ Ia balos ini si Ransah Ulu Balang, ‘ Laho ma hita hu lopou, sungkun hita ma raja huta on’. Das ma sidea i lopou, isungkun pangulu dusun ma raja Parpadanan na Bolag: ‘Sintabi Raja Nami, marhata ogung sitandol sadari nantuari padua arian nongkan, ai aha do parpulungkonon nami?’ Marbalos ma Raja Parpadanan na Bolag: ‘Ou Panggamot Pangulu Dusun, ase ipalu pe ogung sitandol, ase marpulung nasiam ijon. Gonrang i buntu-buntu ma huahap marsaor odap-odap, lang hubotoh aria na siang pakon na golap’. Mase sonai ninta Raja nami, nini Pangulu Dusun ondi. lanjut...
Marsampang ma Raja Parpadanan na Bolag use: “Mambahen na huhatahon hatangkai, sonon do: “Pinggol hun lobei tubuh, tanduk hun lobei magodang; suhun lobei tubuh, si Rahat di Panei hunlobei mamboankon goran”. Anggo Raja Parpadanan na Bolag sikahanan ondi nape mambuat boru, tapi anggo Tuan Anggi (Tuan Rahat di Panei) domma mambuat boru.
Dop ai ipantom ma sada horbou, dear ma iparmasak, mangan ma pangulu dusun pakon gamot, ampa jolma simbuei. Salpu mangan, irungguhon sidea ma pasal na laho mambuat boru hun tanoh hapoltakan, ai ma na margoran Boru Na Mahobor na Matabur, tabur pe i bonana, tabur do i ujungni ; ai i Tanoh Padang Rapuhan do ia.
Dop ai na sungkun ma guru Gubak na Bolon, hatani pangidahan na laho mambuat boru on ; roh ma guru Gumbak na Bolon, itorihma hata-hatani pangidahan, ibuat ma lobei pulungan, ampang-ampang pitu lapis, amak pitu lapis. Itonggor ma tampuk ni untei, isayat ma untei ai, tolpus do anduri ai pitu lapis, tolpus homa ni ampang-ampang pitu lapis ondi, tolpus homani do amak ondi pitu lapis, tolpus homani do tanoh ondi das hu Batang Toru, ibaen tampuk ni untei ondi.
Holsohan guru Gumbak na Bolon bai hata-hatani pangidahan ai. Manungkin ma panggamot, pangulu dusun : ‘ Ou Guru Nami, Guru Gumbak na Bolon, naha do hatani pangidahan in ?’ Marbalos ma Guru Gumbak na Bolon, ninima : ‘ Anggo hatani pangidahan on, hatolpuskonon ni anduri ma on, hatolpuskonon ni losung, langit pe lang jujungon, tanoh pe lang dogeion’. Ipatugah pangulu dusun ma hata ni pangidahan ai bani raja in : ‘Sintabi Raja Nami, anggo hatani pangidahan domma i sungkun hanami Guru Gumbak na Bolon huta on ; hatolpuskonon ni losung ; hatastaskonon ni anduri ; langit pe lang jujungon tanoh pe lang dogeion ; nini Guru Gumbak na Bolon’. Marsampang ma Raja Parpadanan na Bolag : ‘ Ou Panggamotku, ou Urang Kaya Rajulan ampa ham Wakil Datuk Pamogang ampa nasiam Pangulu Dusun Dolog Marjanji Asih, nai age ham Tuan Bandar Mahiou, nai pe hata ni pangidahan ai nasaudkon do mangalop Bou Namahobor Matabur ai. Marsampang homai ma Pangulu Dusun ondi : ‘Ulang be ilanggar hita Raja Nami pangidahanni Guru Gumbak na Bolon !’ Marsampang homai raja in : ‘Puei pe lang podang, podang manampul asu ; hu lombang pe hu lombang anggo na manuruti nangsu.
Doa ai jumpah ari patar padua patar padua ariankon, mulak ma jolma simbuei, mulak ma pangulu dusun, mulak ma gamot-gamot ondi haganupan.
Tidak ada komentar:
Posting Komentar