Jadi manombah ma si Ura na Gulogon ondi dompak Tuan Rahat di Panei, domma taon pisou bani borgokni, sahalak manjolom pisou, sahalak manombah, nini sombahni ma: “Sintabi hita Tuan Anggi huta on, manombah do au bani daulanta, ulang hita marsapata bannami, anggo hita maningon bunuhon do sonari, namanjalo poda do hanami humbani abangta, halani ipatodoh-todoh bou hita, ai do ase nabunuh”. Mintor tangis ma Tuan Rahat di Panei anjaha manaili dompak atas, nini ma: “Ou Ompung Naibata, songon tustus do hape diri, salah idondoni pintorna”. Nai ma partangis ni Tuan Rahat di Panei ondi, seng saut madabuh pisouni sidea use. Ipatugah ma bani Guru Gumbak na Bolon, nini sidea ma: ”Ou Guru Gumbak na Bolon, naha bahen hita partibal ni Tuan Anggi Huta on, maningon bunuh on nini raja huta on, malang atei nami mambunuh, lang tarposhon uhur”. Jadi roh ma podah humbani Guru Gumbak na Bolon: ”Boban hita malah hu harangan”. Iboban sidea ma tongon hu harangan Hatunggulan, i dolog pangainan, i buntu panangkolan, ibayangkon sidea ma i jai i toruh ni buah. Ibahen ma bohalni pitu tumba, pitu gantang, pitu golom pitu kamata boras. Ibahenma sopouni i toruhni buah songon asar-asar ni babui pe lang das.
Mulak ma sidea hu huta, iatur ma homani i tongah-tongah ni huta huda-huda, marhata gonrang, mariah hatani bodil, isangkothon ma homani osang-osangni babui i pagar gasing ni kuburan ondi, anjaha marjaratma, tapi aha pe lang be i kuburan, na lang dong, pasuman-sumanhon do ai songon na tongon na dop matei Tuan Rahat di Panei.
Sadokah lang roh na hun hapoltakan, tong do marmeam huda-huda, tong homai do marhata bodil.
Roh ma na hun hapoltakan, kira-kira satongah arian nari das ma i hasundutan, marsahap ma Bou Mahobor Matabur dompak pangulu dusun, nini ma: ”Ou Panggamot Pangulu Dusun, mase marhata bodil?” Marsampang ma pangulu dusun ondi, nini ma: ”Bodil pangalo-aloon do in Bou, papodas hita malah i dalan on”. Ipapodas sidea ma tongon na mardalan ondi, lambin roh dohorni ma hu Pamatang Parpadanan, marsaran ma sidea, marsahap homai ma bou ondi bani gamot: ”Ou Panggamot, ija do natinongkeian na nidungdungan ondi?” Nini gamot ai ma: ”Papodas hita malah Bou, domma sirsir i lopou dapotonta”.
Ipapodas sidea ma tongon na mardalan ondi, das ma i horbangan, marhata ma gonrang anjaha ididah homai ma marmeam huda-huda, tardosakma darohni bou ondi: ”Naha do panggamotku ou, songon na marmeam huidah huda-huda anjaha marhata gonrang?” Marsampang do gamot ondi nini ma: ”Sihala unte-unte, unte mangan sahala, tondinta do masungkei, badanta matilaha”. Dob ai itombamhon bou ondi ma dirini, matei tarhatosma ia, ialopi sidea Guru Gumbak na Bolon, roh ma Guru Gumbak na Bolon, itulbasi ma bou ondi, mulak manggoluh ma use. Dob ai iboban sidea ma bou ondi hu rumah bolon, ilaburma atap iapoh. Saud ma ikawinkon bani Raja Parpadanan na Bolag.
Jumpahma patarni, ipantom ma horbo pakon lombu, mangan ma jolma simbuei.
Ibagas na sabulan marodor ma halak roh. Ia pangulu dusun mambahen horbou panjunjungini. Ia panjujungi ni gamot lombu ma iboban; ia panjujungini rakyat dayok ma iboban; anjaha mangihut bei do boras ni ai; marguru humbani parbanggalni pamboban ni sidea.
Nai ma adat-adat i Parpadanan na Bolag anggo mompo sada raja, maningon mamboban panjujungi ni bei haganup, marguru bani partibalni bei.
Tidak ada komentar:
Posting Komentar