Tuan Rahat di Panei Sihol Mambunuh Anak Panunda

Marhata ma Tuan Rahat di Panei bani puang bolon, nini ma: ”Ou kaha ou, kahangku, sihol panganonhu do anak panunda, malum namim ateihu, anggo husobur darohni panunda”. Marsampang ma puang bolon ondi: ”Ou anggi, Tuan Rahat di Panei, Tuan Anggi huta on, bau huning ope anak panunda, lobei pamombur hita ma gelah, au satuntuh do songon panarianmu ai, sadari tubuh bana, sadari matei bapani, patut ma tongon panganon”.

Tapi anggo puang bolon ondi, singgan hata do hansa ai, anggo uhurni lang. Nini Tuan Rahat di Panei ma: ”Ou kaha, piga dokah gakni ase mombur?” Nini puang bolon ma marsampang sahap ni anggini ai: ”Baen hita ma parbuhulan, atap parpadanan. Bulan margaga tahun, tahun margaga borngin, borngin margaga bulan, borngin margaga tahun”. Marbalos ma Tuan Rahat di Panei: “Naha do artini ai kaha. Sahap sisonai ai lang ibotoh hanami”. ”Sonon do anggi”, nini puang bolon ondi, ”Anggo borngin margaga bulan, aima lobih ni sabulan tambah use saborngin, ia bulan margaga tahun, aima tambah use sabulan saborngin humbani satahun. Jadi balik ni ai use tahun margaga bulan, atap bulan margaga tahun, domma tumpu haganupan ai lobih humbani dua tahun, nai ma adatni i nagori hapoltakan anggi”. ”Nai hape nimu kaha ou, nai ma hape”, nini Tuan Rahat di Panei. Lanjar isuratkon bani partingkian ni Tuan Rahat di Panei ma buhul ai, mulak ia hun rumahni (rumah toruh). Seng ra ia hundul i lopou. Jagaonni ni do uhurni anak panunda ai, maningon bunuhonni do nini uhurni anak panunda ai, ase ra ia hundul i lopou.

Idokah-dokahni, jumpah ma parjanjian atap parbuhulan, roh ma Tuan Rahat di Panei menuhuni parbuhulan ai, nini ma: ”Ou kaha, ou kaha ou, jumpah ma parbuhulan, maningon panganondo anak panunda, malum niateihonku, anggo huinum darohni anak panunda”. Marsampang ma puang bolon ondi nini ma: ”Tongon do anggi, roh ma ham haduanni ni patar, patarni haduan”. ”Naha do artini hatamu ai kaha?” nini Tuan Rahat di Panei. ”Non do anggi”, nini puang bolon ondi, ”Haduan ni patar dong ma ia opat ari, tambah use patarni haduan tolu ari manjadi tumpu pitu ari”. ”Ia sonai ma nimu kaha, nai hape”, nini Tuan Rahat di Panei. Lanjar mulak ma ia hu rumahni.

Tapi sanggah i holang-holangni buhul aii, domma isuruh puang bolon ualuh halak, si Ura na Ulogon ampa si Atah na Bingaon. Mambuat anakni bodat, anjaha itutungi sideama anak ni bodat ai, atap solur, ibuatma darohni, ibaenkon hu bagas mangkuk. Iberehon sidea ma bani Tuan Rahat di Panei. Nini Tuan Rahat di Panei ma: ”On ma kaha, malumma ateihu, anggo hupangan ma anak panunda”, saudma ipangan ai.

Dob ai, ibani lawang-lawangni ari, roh ma Tuan Rahat di Panei hu lopou hundul. Jadi anggo pakonni puang bolon seng tarpasadasi uhurni, i bagas se i bagas do, i darat se i darat. Kira dob opat bulan dob hundul ia i lopou, marsahap ma Tuan Rahat di Panei mandompak puang bolon, marsaor limbaga non ma nini: ”Ou kaha ou, lang na hubotoh na i alaman, lang na hubotoh na i rumah anggo partibalhon. Dob ma piga-piga dokah dob matei abang ondi, untei paet ma on huahapkon ampa untei jungga, alangma on huahapkon, na i balei alang na i rumah”. Jadi marsampang ma puang bolon: ”Ou anggi Tuan Rahat di Panei, Tuan Anggi huta on, untei paet do tongon anggi pakon untei jungga, songon na lalei do tongon anggi, anggo bohini abangmondi otik pe lang au lupa”. Marsampang ma Tuan Rahat di Panei: ”Antigan do gakni sabou pusok ni uhur?” ”Seng ope hubotoh mangkira anggi”, nini puang bolon ondi. Nini Tuan Rahat di Panei ma use: ”Anggo nini uhurhu kaha, sabou ma songon lobong, ase malum niateihonku, ase sombuh namim uhurhu”. Marsampang ma puang bolon use: ”Seng tarbahen da anggi, marboras anggo lang lobei marbunga, lang tarbahen lobei manangtangi, anggo lang lobei marpusuk”. Marsampang ma Tuan Rahat di Panei: ”Antigan do gakni paimaon ai kaha?” ”Paima ham lobei anggi satahun nari ase sabou”, nini puang bolon ondi. Dob ai itimai Tuan Rahat di Panei ma tongon buhul ai.

Das ma satahun use, das ma buhul ai, jumpah ma buhul ai, seng tarpasadasi uhurni pakon puang bolon ai. Roh ma Tuan Rahat di Panei, ihatahon ma sada limbaga hubani puang bolon, nini ma: ”Ou kaha ou, kahangku, songon horbou sihalung ma huahap”. Nini kahani ondi ma: ”Naha horbou sihalung anggi?” ”Sada dompak natas kaha tandukni, sada dompak toruh. Sombuh ni na mandadang kaha, bonggal ma sipu-sipu, anggo uhurhu i bagas kaha, tangis tariluh-iluh”. Marsampang ma puang bolon: ”Ulang sonai nimu anggin maningon sabou do holi na malungun, tubuhan sampilpil do na matombak, dong do holi paradianan ni na boratan, parsarananni na magulang”, nai ma nini puang bolon ondi.

Tapi anggo rahasia ni puang bolon ondi non do: paganjang-ganjangkon anak panunda ondi otik nari. Ai itungkarang do tene iguranda bosihan. Panak boru Nandorhaya di Bulan do mangurus i tungkarang ni rumah bolon ai. Itanom do seng taridah halak. Borgin do ipainum i rumah bolon. Tapi anggo arian marbuni do sidea i tongkarang. Aima rahasiani puang bolon ondi. Seng iberei matei anak ni ondi ai. Hata-hatani tumang do hansa paihut-ihutkon Tuan Rahat di Panei paima ganjang anak panunda.

Ban lawang-lawang ni ari, dong ma sada jabolon, si ambil-ambil kuah, tapi na nengel-nengel. Laho ma ia mangadu-adu bani Tuan Rahat di Panei, nini na nengel-nengel ondi ma: ”Sintabi banda Tuan nami, dong opei huidah anak panunda, arian i i sidea borngin, borngin do i sidea arian”. Jadi marsampang ma Tuan Rahat di Panei: ”Mase nai nim ambia?” ”Ipaimun puang bolon do anggo borngin Tuan nami, tapi anggo arian seng huidah. Tapi rupani do huidah, anggo alingni seng hubogei. Hita pe lang manghutuk bangku, baluma jolma na nengel-nengel”, naima nini jabolon ondi. Dob konsi ai maruhuri ma Tuan Rahat di Panei use. Laho ma ia marayakhon puang bolon, nini ma: ”Ou kaha ou, ou kahangku, dong opei hubogei baritani anak panunda, sadari tubuh ia sadari matei bapani. Maningon inumonku do darohni, panganonku atei-ateini, ase sombuh naminei siholhu, malum niateihonku”, naima nini Tuan Rahat di Panei. Sampangni puang bolon: ”Ou anggi, Tuan Anggi huta on, dong opei tongon anggi, bahen ita ma buhulta, pakonni parpadanan, borngin margaga bulan, bulan margaga tahun, tahun margaga borngin, borngin margaga bulan”. Dob konsi ai mulak ma Tuan Rahat di Panei hu rumahni. Itingkihon ma tongon buhul ai, ai domma iarusi, songon na parpadanan na hun lobei.

Dokah-dokahni jumpahma parbuhulan ai, roh ma ia use manjumpahkon puang bolon, nini ma: ”Domma jumpah parbuhulan ou kaha”. Balosni puang bolon use: ”Roh ma ham anggi, haduanni patar, patarni haduan”. Dob ai mulak ma Tuan Rahat di Panei use.

Paima das buhul ai, isuruh puang bolon ma si Ura na Ulogon, mansari anak ni mawas. Jumpah anakni mawas ai, iberehon ma bani puang bolon. Das bani panorang ai, dearma iparmasak anakni mawas ondi, anjaha isolur, ipatuduhkon uluni pakon jari-jarini, ampa tapakni naheini, anjaha ibuat homai ma darohni, ibahen hu bagas mangkuk, ibuat atei-ateini ibahen hu bagas pinggan. Isuruh ma na mangalopi Tuan Rahat di Panei hu lopou. Roh ma Tuan Rahat di Panei, hundul ma ia i paratas, iberehon si Ransah Ulu Balang ma pokon puang bolon, galangan na i bagas pinggan ondi bani Tuan Rahat di Panei. Ijalo Tuan Rahat di Panei ma galangan ondi, dear ma ipangan. Dob salpu mangankon nini ma: ”On ma kaha, tongon ma anak panunda ma on, malumma uhurhu, pakon niateihonku”, naima nini Tuan Rahat di Panei.

Dobkonsi ai use, idokah-dokahni ari, kira-kira satahun dob salpu, lanjar do seng tarpadasa Tuan Rahat di Panei paruhuranni bani puang bolon ondi. Jumpah ma sada panorang, marsahap ma Tuan Rahat di Panei mandompak puang bolon: ”Ou kaha ou, kaha ou, songon pargadungan borngin do niatehonku, itangko seng ra bois, marombou sibundangdo huahapkon kaha ou, aekni panubaran, marngotngot na lang butong maniakma na lang ugahan”, naima nini Tuan Rahat di Panei ondi. Marsampang ma puang bolon: ”Mase nai nimu anggi?” ”Ase sonai ningku kaha, nondo: ”Alang huahap na i balei, alang hu ahap na i juma, au ma songon na lalei, hita lang ra lupa”. Marsampang ma puang bolon ondi: ”Tongon do anggi, songon hatamu ai do, anggo au seng ra lupa, bondil tumang do huahap tongon matani abangmondi ijin”.

Jadi nini Tuan Rahat di Panei ma: ”Naha gakni ninuhurmu kaha, turunkon hita ma gakni batang an, ase ulang bondil iidah ham abang an”. Nini kahani ondi ma: ”Seng sungkunon au ai anggi, anggo na manurunhon ai, gamot huta on do pakon pangulu dusun. Anggo sonai ma nini sidea, sonai ma”.

Dokah-dokahni ari use, dong ma sada jabolon, aima na pitung-pitung. Laho ma ia patugahkon bani Tuan Rahat di Panei nasohana partibalni anak panunda ondi, ipatugahma na binogeini pinggolni, agepe lang ididah, non do nini dopak Tuan Rahat di Panei: ”Tuan nami, dong opei hubogei baritani anak panunda, palia sidajoring, joring sidea palia, arian bani sidea borngin, borngin bani sidea arian. Hita pe lang mangkutuk Tuan nami bangku, alingni do hubogei, tompani lang huidah, baluma jolma na pitung-pitung”. Dob konsi ai laho ma Tuan Rahat di Panei marayakkon puang bolon, nini ma: ”Ou kaha ou, ou kahangku, dong opei hubogei baritani anak panunda, sadari tubuh bana, sadari matei bapana, anggo husobur namin darohni, huatah atei-ateini, sombuh namin uhurhu, malum niateihonku”. Marsampang ma kahani ondi: ”Dong opei tongon anggi, bahen hita ma parpadanan na rombang parbuhulan”. ”Antigan ma kaha?” nini anggini ondi. ”Bahen hita ma buhulan anggi, bulan margaga tahun, tahun margaga borngin, borngin margaga bulan”. Dob ai mulak ma Tuan Rahat di Panei hu rumahni. Anggo Tuan Rahat di Panei seng ra ia totap hundul i lopou, songon na gajah bulingsiron do, halani baritani anak panunda ai.

Dob ai jumpahma parbuhulan, atap parpadanan ai, roh ma ia use marayakkon puang bolon, nini ma: ”Ou kaha ou, ou kaha ou, domma jumpah parbuhulan, anggo nini ateihonku, au malah mamunuh anak panunda”. Marsampangma kahani ondi: ”Seng pala ham anggi mamunuh, au ma gelah mamantom anak panunda”. Nini Tuan Anggi ondi ma use: ”Dear do ham kaha mamantom atap manayat, asal ma huidah”. Anggo nai do anggi, jenges do, roh ma ham opat borngin nari. Jadi mulak ma Tuan Rahat di Panei hu rumahni.