Tubuh Anak Panunda, Matei Raja Parpandanan

Mintor tarolos ma jongjong Raja Parpandanan na Bolag ai, jadi madabuh ma raot na i abingan ni raja ondi, hona ma indungni naheini, bosur lanok do darohni, hitirma ia, turun ma ia hu toruh, hun pantangan ai. Sanjongkal nari mando sidalanni ase das ia hu laman, madabuh ia lanjar matei raja ondi. Halani ai gaya-guyuma sin rumah bolon pakon sin huta. Lape dong sae anak tubuh ondi homai i rumah bolon, halani mambogei kabar ai mintor jongjong ma puang bolon ondi, seng be isarihon anak ai, anjaha guling ia hu talaga anak ondi, anjaha luha do otik parsuntinganni, lanjar ipatugah sidea ma bani Guru Gumbak na Bolon. Roh ma Guru Gumbak na Bolon, tarolos ma ia mangubung raja ondi, seng tarpagoluh be.

Lanjar ipukul si Ransah Ulu Balang ma ogung sitandol i balei ganjang Sihampilis. Pulung ma halak ganup pakon panggamot, pangulu dusun, iatur sidea ma ranggi ni huda-huda pakon na mambuat batang. Lanjar ijaga sidea ma huta pamatang Parpandanan na Bolag ondi.

Jadi anggo na tubuh ondi, panakboru Nandorhaya di Bulan do paturei-tureihon, tapi anggo puang bolon ondi seng isarihon be anak panunda ondi, ai sadari tubuh ia, sadari matei bapani. Sampei do pitu ari pitu borngin igonrangi atap idingguri, anjaha ihuda-hudai raja ondi. Salpu ai ipahusor sidea ma batang, itandurhon ma i rumah bolon, dob konsi ai mulak ma jolma simbuei haganup, tapi anggo pangulu dusun pakon gamot tading ope i lopou, kira-kira tolu bulan dokahni. Dob-dob manrunggu manjaga nagori Parpandanan na Bolag, ai domma roh ontam-ontam ni halak musuh hun nagori Bondailing laho manoluk Parpandanan na Bolag. Iatur sidea ma hubuan, haliling pamatang in, tong ma siap borngin isuruh puang lima manrawaki atap marakahap. Naima adat-adatni parmunsuhan na hinan.

Dob konsi ai manriah ma gamot pakon pangulu dusun, nini gamot Urang Kaya Rajulan ma dompak pangulu dusun: ”Ou Pangulu Dusun! Naha ma dob ni hita on, kahou hita lang marbapa, ise pe lang tarbahen gabe wakilni Raja huta on, paima maganjang anak panunda, domma haliling musuh, huahapkon uhurni halak, na laho manoluk hita i huta on”. Pusok homai do uhurni pangulu dusun ondi, seng ibotoh sonaha sampang ni hata ni gamot ondi.