Hona Dorma Panak Boru Rangga Huning (II)

Dob ai lahoma sidea hu huta, das ma i rumah bolon, marayakhon tulangni ondi, marsahap bei ma sidea.

Dob ai jumpah ari patarni use ipungkah sidea ma parsahapan pasal partibalni na laho mambuat boru ondi. Marhata ma Tuan Padang Rapuhan: “Ou ambia Sormaliat, naha do panroh nima in ambia? Songon na so margamot do ho, songon na so marpangulu dusun”. Jadi marhata ma si Sormaliat ondi: “Aha do gamot aha do pangulu dusun ai so ibotoh hanami in tulang”. Jadi marhata ma tulangni ondi: “Anggo songon panroh nima in do ambia, aturanni na mangajari anngimu in do ho. Gamot huta on pe lang mambotoh, au pe lang mambotoh. Arahkon huji ai lang holi roh mangirik-irik gamot huta on? Ulang lang ibotoh ho ambia, anggo aturanni na marlua-lua seng pala botohon kin in. Jadi longang do si Sormaliat ondi, ai seng ibotoh arusanni hinatahon ni Tuan Padang Rapuhan ondi.

Dob ai jumpah ma ari patarni, roh ma si Sormaliat ondi hubani anturangni nini ma: “Nanturang, suruh hamu ma borumu ase laho hanami hu Parpandanan na Bolag”. Marpingkirma anturangni ondi seng ibotoh sonaha mambalosi hatani panagolanni on, non ma nini: “Ai ningku pe nabaruon amang, ajar-ajari anggimin, seng hanami mangulang mase au marsuruh ihatahon ho? Anggo domma mambotoh gamot huta on ampa pangulu dusun sidea do ompunganni si Rangga Huning, na paganjangkon do hanami, gamot huta on do simada boru, ai pe anggo boi iajar-ajari ho boban hujon ase adong mangurupi tanganni amboru ni halak on”. Dob konsi ai laho ma tongon si Sormaliat ondi bani panak boru ondi, lanjar do seng dapot sahap na madear. Dob konsi ai mulak ma ia. Dokah-dokahni ari horja raja ma sidea ijai haduasi ampa jabolonni.

Roh ma panorangni sahali, marpingkirma tulangni ondi, ibahen ma parsujian, ai domma iahap tulangni ondi dong lepakni bani pardalanni halak ondi ampa parsahap-sahapni pe, songon na jengesan do parlahouni si Tahal Tabu pakonni si Sormaliat ondi. Mangintai ma tulangni ai, ambit bani parpanganni pe ambit bani parsahapni, anggo si Sormaliat songon parlahoni jabolon do ampa parsahapni pe. Tapi anggo si Tahal Tabu songon parlahouni anak ni harajaon do age parsahapni. Jadi isuruh tulangni ondi ma si Sormaliat marmahan horbou lahoma ia hu parmahanan, jadi iburai do horbou ondi, nini ma: “Hoh, horbou tungkur-tungkur, parsilini ompungna, ambit matei ma ho nian magulang, mangan horbou ma nian iba”. Dong ma na mambogei hatani ondi samah sidea parmahan, bodarini mangadu-adu ma hasomanni parmahan ondi bani Raja Padang Rapuhan, ipatugahma naniburaanni horbou ondi ampa ipasu-pasu magulang. Tapi anggo raja ondi isuratkon do hata ai i bagas uhurni, anjaha iponophondo hata ai, seng ra ia manungkun bai si Sormaliat, ibani nabinuraanni ai.

Jumpah ari patarni usei, isuruh tulangni ondi ma jabolonni ondi marmahan, ai ma na margoran si Tahal Tabu. Laho ma ia marmahan. Dong do hape usahani na so binotoh ni hasomanni ondi, ai naniboban hun Parpadanan na Bolag, sada suri omas, pakonni rudang omas, pakonni tulila omas, ibahen bana ma sada tanduk, hujai ma ibahenkon pusaha ondi, boi ulos-uloson, boi pamasukon bani tandukni horbou na legan, tanduk ingananni pusaha ondi. Jumpah ma panorang ai ma sanggah tongah arian matani ari, malohei ma iahap seng roh opei indahanni. Jadi martulila ma ia, nini sorani tulilani ai ma, saor mandoding ia: “Tulila-tulila pahu, ai huidah tulang mabiar au, seng huidah tulang masihol au”. Dong ma namambogei sama-sama parmahan sorani tulilani ai.

Jumpah bodarini use ibahen tulangni ondi ma partahianni atap parkahap atap sonaha ulahni si Tahal Tabu. Ipatugah parkahap ondi ma: “Tuan nami, patugahonku do na huidah, lang au na manlobihi, lang au na mangkurangi, mabiar do ahu bani rajohinta puang, nondo: “Anggo parlahouni si Tahal Tabu, anggo horbounta hujinma gagaton na majenges, hujindo ipatuduh-tuduh, ambah ni ai tuan nami martulila do ia, pakon mandoding, nini hatani dodingni do: Tulila-tulila pahu, ai huidah tulang mabiar au, seng huidah tulang masihol au”. Iponopkon raja ondi do anggo hata ai. Jumpah ma patarni, iarahkon raja ondi ma namargoran si Sormaliat huparburuan. Laho ma sidea waluh halak na hu parburuan ondi. Sanggah i tongah opei, dong do saianan bulung-bulung aima na margoran bangun-bangun mombur-mombur. Jadi marhatama panogolanni ondi: “Ah mombur ni bangun-bangun on, aik binolgang ma nian onsinda tabo ma? Gedong nian sagarbak angkupni on tulang, dabutong ma bituha?” Longang tumang do uhurni tulang ni ondi. Isimpan tumang do i bagas uhurni anggo hata ai. Das ma sidea bani lapang, iondoskon ma hela ni ondi: “Ou Sormaliat, ijon ma ho ambia hanjan ma hanami mangaui, on ma bodilmu nah”. Roh si Sormaliat ondi itangkap ma tongon bodil ondi. Nini tulangni ondi ma: “Anggo hanjan holi roh ursa ai, dompak jan ma ho mambodil, ulang torbang holi timahmu bani halak na legan”. “Eak tulang”, nini panagolanni ondi. Jadi laoma tulang ni ondi paunbalkon asuhan lopahni habungan, ipaumbal ma asu ondi, roh ma ursa ondi dong lima dompak parbodil ondi.

Marhata ma tongon bodil ondi lima hali, sada do hansa hona. Ia pe merung-merung do halani borit-boritan anjaha mangkat-angkat do mardalan ai ma ursa na dapot ondi. Mardilou ma tulangni ondi: “Naha do Sormaliat? Dong do dapot? Dong do hona?” Marbalosma si Sormaliat ondi: “Adong do tulang, roh ma nasiam. Ai pe ipagaldap ijon sedo nabagusan”, nai ma nini si Sormaliat ondi. Roh ma tongon sidea haganup. Jadi jumpah nasida ma ijin sada ursa tibal. Anggo ursa on merung-merung do. Na mampang-ampang do hape ursa ondi. Jadi itutungi sidea ma, isuruh ma patureihon si Sormaliat ondi iparburuan ai, ase manambul-nambul sidea lojo ijai. Seng ibotoh marmasak gulei ai. Anjaha marimbulu-imbulu do homani. Songon na magigi do tuhan ai mangankon. Dob ai laho ma sidea hu huta, iboban ma gulei ondi hu rumah.

Das i rumah bodarini ipaturei si Sormaliat ai ma gulei ai, panganon ni puang bolon age panganonni panak boru. I rumah bolon do ia patureihon gulei ai. Tapi anggo ilopou dong do na patureihon guleini nasi tuhanta. Domma mangan ma i rumah bolon ondi, dob konsi ipangan sidea nanipatureini si sormaliat ondi, sadia sagala namangankon gulei ondi, dop salpu mangan mutah-utah haganup. Sonai homa age panak boru mutah-utah do.

Jadi manisei ma na hun lapo nini ma mangkatahon juak-juakni: “Torih ma na i rumah in ambia, namahua do in? Songon na gunsang halak in, bahat hubogei na moyak-oyak”. Lahoma tongon juak-juakni hu rumah bolon: “Naha ase mutah-utah hita i rumah bolon on ganup?” nai ma nini juak-juak ondi. Marsampang ma sahalak puang pardahan: “Ai anaha, ai gulei na sonaha do gulei in? dob konsi ipangan hanami mutah-utah do hanami haganup. Sonai age puang bolon huta on, sonai age panak boru huta on. Ganup do hanami mutah-utah”, nai ma nini puang pardahan ondi. Jadi nini juak-juak ondi ma: “Hanami dahkam i lopou seng dong namutah-utah”. Jadi mulak ma ia hu lopou. Ipareksa Tuan Padang Rapuhan ai ma i bagas uhurni, anjaha isungkun ma atap ise do napatureihon gulei ai. Idilo ma sada hun rumah bolon na si puang jadi ipatugahma: “Helanta do tuan nami, si Sormaliat, napatureihon gulei ai panganon nami. Tapi dong parbauni gulei ai, songon na dohot do gakni kotoranni anjaha mardai garam pe lang”. Jadi mintor dong homai patugahkon sahalak use aima hasomanni puang ondi, aima jabolon, nini ma: “Ia gulei nami maporat do, tapi songon na mapaet, songon na bau toisni lombu homa”, nini sahalak ondi. Tapi anggo Tuan Padang Rapuhan ondi inunut do ai ipansuratkon i bagas uhurni sagala ulahni panagolanni ondi, nai age parsahapni.

Dob ai jumpah ma ari patarni use, iarahkon si Tahal tabu marburu. Jadi domma jumpah i tongah dalan bulung-bulung saianan, ai ma sitorei ombun goranni. Sambil-sambil mardalan, inunut ipamputikhon bulung-bulung ondi. Jadi marhata ma Raja Padang Rapuhan ondi hubani atap hubani bana mangajak nini ma: “Ou Tahal Tabu, benahamu in ambia?” “Ben gagatonni huda in holi tuan nami”. “Ah dear ma tongon da ambia”, nini tuan ondi. “Ijai, i harangan toras on tongon seng dong holi buaton gagatan ni hudanta on. Somal do gakni ho marhuda ambia, mintor ibotoh ho do gagatonni huda sijengesan”. Jadi nini si Tahal Tabu ondi ma: “Lang ongga au marhuda tuan nami, bapaku pe lang ongga marhuda, hita pe lang mangkutuk bangku, baluma diri jabolon-jabolon. Halani parhuda somal huidah, ai do ase hubuat on”. Dob ai laho ma sidea hu parburuan ai.

Das ijai mintor itambathon si Tahal Tabu ondi ma hudani raja ai, anjaha iberehon ma gagatan ondi, nani bobanni nongkan. Tapi anggo raja ai, iponophon do ganup i bagas uhurni parlahouni si Tahal Tabu ai. Dob ai manggompangi ma si Tahal Tabu iberehkon ma bai sada bodil, nini aja ai ma: “Ou Tahal Tabu, anggo hunjon roh ursa ambia dompak jan ma ho mambodil, anggo han jan roh ursa dompak jon ma ho mambodil. Ulang torbang holi timahmu bani halak na legan”. “Dear do tuan nami”, nini si Tahal Tabu ondi. Lahoma na mangasui hun borno atap hu suah abing reben do anggo pambodil ondi humbai urung-urung do anggo panggora tapi anggo Tuan Padang Rapuhan ondi hun hampit sambilou ni si Tahal Tabu ondi do kira-kira sapuluh holak, atap sonaha holi tene, maluah ursa ai agendo au mamodil sonai uhurni raja ondi.

Mulai-mulai masuk ope na mangasui ondi, mambogei harasni ai, domma buhar sada ursa, mandapothon si Tahal Tabu ondi, ai lapang-lapang banggal do ni iankonni sidea ondi. Tolkasma bodilni si Tahal Tabu ai, mintor gardas do ursa ondi, tontang pamunuan do bagas ni timahni. Mulai marhata asu use, luar homai ma ursa ondi, ilipat homai, mintor pipina do hona. Matei homa do ursa ondi ijin. Luar homa use sada nari, ilipat homa dapot hona do. Tontang rusuk poso-posoni das hubani pusu-pusu, tompas homai ma ursa ondi. Marhata ma pangasui ondi nini ma: “Naha do Tahal Tabu, dong do hona?” Marhata ma si Tahal Tabu: “Dong do, roh ma nasiam”. Nape dong das hubai ursa ai sidea, ipatugahma bani raja ai, pangonaini timah ai haganup, nini ma: “Tuan nami, parlobei ai nongkan pamunuhanni do hu bodil, paduahon ai pipina, patoluhon ai pusok poso-poso, torih hita ma ai. Ai ma siharni bodil hubaen, atap na tongon ai lang ope nabotoh, mandapot ijai ma tuan nami”. Das ma tongon bani ursa na dob gayap ondi, tongon songon tinuri turihon ni si Tahal Tabu ai, jadi longang ma raja ondi. Isimpan do i bagas uhurni.

Dob ai itutung sidea ma anjaha dear ma iparmasak, tambul-tambulni sidea i parburuan ai. Tapi dong rahasia ni si Tahal Tabu ondi naso binotohni halak. Ibuatma humbani ujungni jambulanni rahasiani ondi, morumma gulei ondi. Jenges tumang do parmasakni si Tahal Tabu bai gulei ai. Iberehkon ipangan raja ondi, mantin tumang daini gulei ondi. Sonai homa hasoman ni sidea na onom halak ondi.

Jadi dob mangan gulei ai sidea, laho ma mulak sidea hu huta, tapi seng tarboan sidea gulei ondi, singgan sada ursa ma boi iboban sidea hu huta. Tading do anggo si Tahal Tabu mangian-ian ursa na dua nari. Laho ma na onom halak ondi pakon raja ondi hu huta. Kira-kira das i tongah dalan na laho hu huta ondi, domma mamotong dalan anggo si Tahal Tabu pakon hasomanni orang bunian, naso binotoh ni halak, mamboban ursa na dua nari ondi. Das ma i horbangan si Tahal Tabu ondi, mintor mulak ma hasomanni orang bunian na dua halak ondi.

Das use Raja Padang Rapuhan ai, domma jumpahsi i horbangan ai si Tahal Tabu ampa ursa na dua ondi. Mintor longang homai ma uhurni, nini ma; “Idah, ma ijon ho hape ambia, gulei in pe domma ijin homai, naha do nongkan pardalanmu ase mintor das ho ijon? Ise do hasomanmu mamboban gulei on hujon? Lobenan ho das ijon ambia, ai longang tumang do uhurhu”. Jadi marsampang ma si Tahal Tabu ondi nini ma: “Lang pala longang uhurta tuan nami, pamotongan do nongkan dalan nami. Dong do hasomanku nongkan mamboban gulei on”. “Ise ambia?” nini raja ondi. “Goranni seng hubotoh tuan nami, tapi ambit ijon ia hutandai do rupani”. “Parja ambia?” nini raja ondi. “Seng hubotoh tuan nami atap parja”, nini si Tahal Tabu ondi. “Dompak ja nongkan lahoni ambia”, nini raja ai. “Han jon do hujan lahoni tuan nami”, nini si Tahal Tabu ondi.

Dob ai iaturhon sidea ma na mangusung gulei ondi ampa namanringringi, ai bahat do roh parhuta in mangurupi patureihon gulei ai. Siap ma irangrangi sidea, isungkun raja ai do parhuta ai haganupan nini ma: “Ise nongkan nasiam na mangurupi ambia on? Namamboban gulei on das hujon?” Sada pe lang dong na mangaku halak ai. Jadi ipaima sidea otik nari atap roh namangurupi ai, parhuta na legan nini uhurni raja ai. Lalab do seng dong na roh. Dob ai iboban sidea ma gulei ondi hu rumah bei otik-otik bei. Tapi anggo bagian tongah bulat do sada ursa, hu lopou ma itaruhkon halak ondi, tapi anggo si Tahal Tabu, laho do ia mambuat buluh panlomangan, sonai age sagala hosaya-hosaya, sonai age sagala bulung-bulung namantin panganon antupni gulei. Dob konsi pulung binuatni ondi, iboban ma hu lopou, manisei do anggo raja ondi: “Iak, benaha in ambia?” nai ma nini raja ondi. “Antupni gulei ondi tuan nami”, nini si Tahal Tabu ai. Jadi marhata ma raja ai: “Jenges ma tongon da ambia, anjaha homa lobei paturei panganonta, sonai age i rumah bolon”. Jadi ipaturei si Tahal Tabu ma tongon. Jadi itektekhon bana ma homai minak rahasi ondi humbani ujung jambulanni, naso binotohni halak. Dobkonsi imasak gulei ai, iberehkon ma hu rumah bolon, sonai age hu lopou, mantin tumang do daini gulei ai ipangan sidea.

Tapi domma hape otik aima rahasia ai, nanitektekonni ai, isuruh marsaor dorma, ai ma si tengger na madaoh, naipatureini sidea ondi sanggah i Parpandanan na Bolag opei sidea.

Salpu ai jumpah ma use ari patarni, isuruh ma si Tahal Tabu ai hu juma maninggala. Hira-hira tongah arian matani ari isuruh panak boru ma panak boru Rongga Huning manaruhkon indahan ai, aima sapadang ampa boras jagul mangihut otik borasni omei, aima indahan ni jabolon ondi tinaruhkonni panak boru ai. Das ma i juma sanggah maninggala si Tahal Tabu, jumpah panak boru ai, jenges-jenges homai do paninggalana i juma na bolag ai. Mardiloma panak boru ai nini ma: “O Tahal Tabu, mangan ho, andon indahan on!” Marsampang ma si Tahal Tabu ai: “I sopou in ma tibalhon hita lai, panak boru!” Jadi nini panak boru ai ma: “Manganma gelah ho sonari, andin domma tongah arian matani ari, ai seng malohei iahap ho? Gayuranma gelah ho sonari”, nini panak boru ondi. Marbalos ma si Tahal Tabu ondi: “Lai panak boru, somal do panak boru tong lohean, tong do gayuran, tong do lohean, seng do lang gayuran, hita pe lang mangkutuk bangku, balouma diri jabolon. Non do panak boru dongdong mariah dongdong, dongdong mariah panei; ia singgorah dong nihamalashon atei. Ia singgorah lang, seng diri hadoban atei”.

Longang ma panak boru ondi mambogei pantun ni ai. Mulak ma tongon panak boru ai, itadingkon ma indahan ondi. Itibalhon bani para-parani sopou. Jadi anggo panak boru ondi, monggop do bai biding juma ondi paimahon ase laho mangan si Tahal Tabu ondi hu sopou. Laho ma tongon si Tahal Tabu ondi manambathon horbouni ondi lobei hubani biding juma ondi, bai na dong gagatan. Dob ai laho ma ia hu lopou. Das ma ia i lopou, roh ma panak boru ondi manirim-nirimi hu biding ni sopou ai hun darat. Itorih-torih panak boru ai ma homa na mangan ai ma anggo si Tahal Tabu ondi, ibuat ma sada taruguy anjaha iaroti. Dob konsi irungrung indahanni ai bani atas bulung, ijukjuki ma boras ni omei ai, ai ma ipangan. Anggo boras ni sapadang ondi ampa boras jagul ondi, iberehkon do hubani horbouni ondi. Itogu ma horbouni ondi hu lambung sopou ai, iberehon ma hubani horbou ai indahan ondi, anjaha marhata ma ia hubani horbou ai: “Na horbou paninggala, sahira indahankon hubere bam, ulang ho da ringis-ringisan, paninggalahononku bani juma ni tulang on. Barita ni haguruon pakon barita ni paralamat tulang hape i huta on, igantih halak pe hape panagolanni, seng ibotoh”. Dob konsi ai ipainum homa ma horbou ni ondi, ibuat bulung hawei, jadi sahira inumonni ondi ipansoburhon do bani horbou ni ai. Anggo panak boru ondi hun darat ni dinding ni sopou ai, hanget do ia surut anjaha mintor mulak do ia homa hu huta. Das ma i rumah panak boru ondi, mangadu-adu ma ia bani puang bolon, ipatugah bana ma nanidah ni matani pakon nibogei ni pinggolni hubani puang bolon ai. Roh ma puang bolon ai use homa ipatugah homai ma bani Raja Padang Rapuhan ondi, ijai ma baru ibotoh raja ai, na dob igantih halak hape panogolanni ondi.

Dob ai marpingkir ma ia, naha ma bahenonku nani, nini uhurni. Jumpah ari patarni iarahkon ma si Tahal Tabu ondi, dong sada pohon parkobunan tobu, tobu do hansa pitah ijai isuan, ibobai ma ia hunjai. Masam-masam goran ni tobu ondi sambil mardalan-dalan nini tuan ai ai namanungkun goranni tobu ondi: “Tobu aha di ibotohko goran ni tobu on ambia?” nai ma nini raja ondi. “Tobu malnou tuan nami”. “On use tobu aha?” “Tobu hapur”. “On use tobu aha goranni on?” “Tobu pantis tuan nami”. Nai-nai ma panungkun ni raja ondi, anjaha sonai ma pambalosi ni si Tahal Tabu. Jadi dong sada nari goranni tobu, isungkun tulangni ondi ma: “On tobu aha on?” Songon na marsarat anjaha songon na marpantun do pambalosini goran ni tobu ai, nini ma: “Anggo on tuan nami tobu olang ni panarian olang ni paruhuran, olang-olang irurut, nirurut olang-olang, siholang do huahapkon jadi suhut, suhut jadi siholang”.