Hona Dorma Panak Boru Rangga Huning (III)

Mintor marsahap ma Raja Padang Rapuhan: “Age nai ambia, songon na heran do paruhuranku, bosur pe au mangan songon nanihatahonmai do songon na holang do au mangan anjaha lohean do paruhuranku, mangidah hanima ganup na roh hun Parpandanan on, domma das hanima gonup na roh hun Parpandanan on, domma das hanima hira-hira tolu bulan…

ia ma ipanjunjukhon hubani boras ni omei ni indahan ai, ipangan bana ma na lengket bai taruguy ai, anggo boras sapadang ondi ampa indahan jagul ai iberehon do bai horbou ni, nini ma dompak horbouni ai. Hutagat dong napinarsahapkonna, hape horbou ai do iparsahapkon, nin sahapni ma: “Ale horbou paninggala, ambilanni tulang hubani huta na daoh, tarbarita do guru anjaha paralamat, tapi igantih halak do hape panagolanni seng ibotoh”, nai ma nini. Ase longang tumang do uhurhu. Dob ai mulak ma au hubani panorih-norihankai, laho mau au hu biding juma ai anjaha monggob do lobei au tongkin ijai, atap sonaha paninggalani tene i juma ai nini uhurhu, anjaha jenges-jenges do paninggalani. Turun-turun maninggala ia, inunut do mandoding-doding, bahat do dodingni ai ampa umpasani seng haru hubotoh patorangkon. Ondo hansa na dapot uhurhu ijai. Ia lang huidah tulang masihol au, ia huidah tulang, sonon ma pangandunganku. Dob konsi ai mulak ma au”.

Dop ai dong pe sahapni taringat bani si Tahal Tabu, songon jenges ni parlahouni, songon parlahouni harajaan. Itarsingati panak boru jabu ai use parlahouni si Sormaliat ampa parsahapni songon na so mambotoh turut, songon parlahouni jabolon maningting do parlahouni. Nai ma sahap humbani panak boru ondi. Jadi ipatugah bapani ondi ma use nanidahni matani pakon nibogei ni pinggolni, parlahou ni si Tahal Tabu ondi, songon na i parburuan, hormatni sahap, songon anakni harajaon do parlahouni. Age pe ia jabolon. Dob konsi marsipatugahan sidea, marsahap ma puang bolon: “Atap na igantih halak do panogolanta in, atap jabolon ai do anak ni nasi besan bali hun Hasundutan, atap si Sormaliat ai do jabolon. Pareksa hita ma ai tuan nami”, nini puang bolon ondi manghatahon Raja Padang Rapuhan ai.

Jumpah ari patarni use, iuji Tuan Padang Rapuhan ondi ma si Sormaliat, iboban ma ia hu bona ni tobu ondi, nini ma: “Ou Sormaliat”. “Ou Tulang”, nini mambalosi. “Tobu aha on ambia?” “Tobu siallangan ma i da Tulang”, nini. “Goranni ambia?” “Tobu na uli Tulang”, lalap italpokkon ma tobu ondi, lalap ipangan.

Hlm. 120…

“Ah na denggan hape Tulang i kobun mu on” nini ma homa. “An na sada an ambia, tobu aha do an?” “Hudai lojo Tulang”. Italpokhon bana homa sada use. Sonai do iharati tobu ondi lang pala marpisou. Jadi ipatugahma bani tulangni ondi. “Tobu na tonggi ma goranni tobu on tulang”. “Goupsa i, goupsa i, tobu na tonggi do”. Seng pala ganup be isungkun goran ni tobu ondi, ai domma mangintei uhurni songon parlahouni jabolon ma. Anjaha sahap ni ai pe se be sahap ni sin Parpandanan na Bolag be. Songon parsahap ni huta na legan mando.

Mulak ma sidea hu rumah, ipatugah raja ondi ma hubani puang bolon. Jumpah ari patarni use, iboban ma si Tahal Tabu dong sada kobun panuanan sagala bunga, sonai age rudang na marium-rium. Iboban ia hujai songon na pasaehon bona ni bunga ai. Das ijai isungkun Tuan Padang Rapuhan ondi ma si Tahal Tabu ondi, anjaha ijolom ma pisou sanggah na manungkun ondi: “Ou Tahal Tabu, dong sungkunonku bam ambia, anggo lang ipatugah ho bangku, huobog ma borgokmin bai pisou on”. “Aha patugahonku bamu tuan nami?” “Ho domma igantih halak i tongah dalan ambia na baru on na laho hujon ondi”. “Lang tuan nami”, nini si Tahal Tabu ondi ma. “Lang pe nim ambia, domma. Patugah ma, anggo lang huobog ma”. “Iobog hita pe au tuan nami dear do, agendolah podas marbapa”. Songon na mambangor ma uhurni Raja Padang Rapuhan ondi. Isungkun ma use nenget-nenget marhasoman elek-elek, nini ma: “Patugah ma lah ambia atap na adong do hanima na marbulawan, boi do huuhal-uhal bulawan nima ai”. Jadi tangis ma si Tahal Tabu ondi mambalosi, nini ma: “Domma ipabonduthon hubangku tuan nami, raot atei-atei, sadiha sagala pakeanku mintor isalih sidea, halani ai do ase mabiar au patugahkon banta”. “Anggo nai do huuhal-uhal pe”, nini tulang ni ondi. Jadi iuhal ma tongon sibijaon ondi, mandarat ma raot na etek-etek nabinondutni ondi. “Tapi ulang patugah-tugah da ambia” nini raja ondi homa. Dob ai laho ma sidea hu huta.

Jumpah ari patarni use, iarahkon ma si Sormaliat mambuat hayu sada hu harangan. Ibuat sidea ma hayu na martupang, iboban sidea ma ai hu pohon ni raja ondi, ibaen ma sada bayangan hayu.

Hlm. 121…

“Ijon, patugah ma bangku, sabotulna do ho si Tahal Tabu atap jabolon sabotulni do si Sormaliat anak ni Raja Parpandanan”. Unduk do ia seng ibotoh sonaha mambalosi hata ni raja ai, iluhni tumang do hansa marbalos. Seng ra ia patugahkon lalab. Mabiar do ia sibijaon ondi. Dob ai mulak ma sidea hu huta. Ipareksa raja ondi ma i huta parpangananni, tapi ayapan ni raja ondi mando ibere, seng ibere be buah ni sapadang, naha pe tene panagolanku do on, gendo ulang lohean ia. Ipangan pe ayapan ondi, songon parpangan ni anak ni harajaon do. Dob ai isuruh ma ia hu juma maninggala use. Iajak do horbouni ondi dob salpu maninggala ondi, huja ma parmahanan si jengesan, hujinma ipatuduhkon horbouni ondi manggagat. Anjaha mandoding ma ia i atas ni horbouni ondi, sambil martulila, nini dodingni ma: “Horbou paninggala e boban holang-holangmu, patortor ma gan sigei, ilonggi-longgi laklak, i gumba dian on. Botou pinarsinta e tudung parmaluanmu, bador-bador ma hita na dob igantih halak i huta dian on”. Dong ma na mambogei dodingni ondi hasomanni parmahan. Ipatugah homai ma age bani panak boru, sonai age hubani puang bolon. Dob ai marpingkiri ma homai age panak boru ondi, nai age bapani ondi. Naso binotohni halak, jumpah ma sada panorang marrunggu ma sidea na tolu, aima puang bolon pakonni panak boru Nansanduk di Hataran nai age bapani ondi, non ma hatani harungguan ni sidea ai: marsipatugahan bei ma na nididah ni sidea, ia nini panak boru ai ma: “Anggo na hubotoh, ia si Tahal Tabu horbou ai pe jenges do ibahen seng ra ilipati. Anjaha dong homai sapahara nai inang” nai ma nini panak boru ai dompak puang bolon ai. “Naha pambotohmu ai?” nai ma nini puang bolon ai.

“Sanggah na manaruhkon indahan sinuruhmu ondi au, ai domma gan hupatugah bamu”. Jadi nini puang bolon ai use homa: “Domma tongon ipatugah ho bangku. Ase haru porsaya bapanta ijin, torangkon agelah sonari”. Jadi roh ma panak boru ondi ipatugahma na binothni ganup, nini ma: “Sanggah au na baru on na manaruhkon indahanni ondi, mangan ma ia i sopou ai, roh ma au hun pudi sopou ai manirim-nirim, hutorih ma hun holang-holangni dingding, iarid bana taruguy sada,…

Hlm. 122…

nabinobanni sidea ai. Manungkun ma si Sormaliat ai, “Ai bayanganni ise pinadearta on Tulang?” Marhata ma raja ai: “Dong do sada sibayangkonon ambia, rayat huta on na tardogei tapak na opat. Nai age subahon lobei hubagas bayangan in, atap na dear ma”. Jadi roh ma si Sormaliat ondi, ijukjukhon ma tongon naheini hu bagas bayangan napinaturei ondi. Roh ma raja ondi ipahat ma bayangan ondi, pangkuh do ibahen pating-pating ni bayangan ai. Lanjar itadingkon ma ia ijai, nini si Sormaliat ai ma: “Tanggali ham naheikon Tulang, ulang tadingkon ham au Tulang, mase ipaturut ham au i bayangan on?” Nini tulangni ai ma mambalosi: “Ai ambia, domma ijalo ho na matobu, jalo ma use na mapaet. Naisoluk ho do hape panogolanku, ipabonduthonho raot, goranmu do hape si Tahal Tabu, ibahen ho goranmu si Sormaliat, in ase andung ma lobei in. Anggo ho maningon masik i bayangan ma, paima roh manobus ho, anggo dong do gakni hade-hademu, nini uhurhu seng dong”. Tangis ma ia lanjar itadingkon.

Das ma i huta, ipatugah ma bani puag bolon sonai age bani panak boru Rongga Huning, na dob ibayangkon jabolon na manggantih ondi. Jumpah bodarini use, ipanggil ma gamot hu lopou, ipatugah raja ondi ma sagala na tarjadi ondi haganup, humbani bonani das hubani ujungni. Longang bei do gamot ai mambogei turi-turian ai. Jadi ibahen sidea ma riah sada taringat Tuan Sormaliat. Putus riah ai, isuruh sidea ma suruhanni sampuluh dua halak hu Parpandanan na Bolag ase roh hun jai mangalop panak boru Nansanduk di Hataran, tapi dua bulan i dalan baen dalanansi.

Sanggah na i bagas na dua bulan ai, dua bulan ase laho mulak hu Padang Rapuhan, roh ma gamot hanjai ampa pangulu dusun. Aima goranni gamot ai na mamboban rayat ganup, ai ma Urang Kaya Rajulan. Anggo Wakil Datuk Pamogang tading do ia i Parpandanan na Bolag mangaturhon na paturei barung-barung ni na roh holi mangoraskon siduda omei atap sipaturei baluhat. Anggo Pangulu Dusun Tuan Bandar mahiou pakon Dolok Marjandi Asih pakon Dolog Sigualon pakon Tuan Martangka Hambing, ompat do pangulu dusun anjaha mamboban gonrang do sidea.

Mamboban horbou pitu, nai age lombu, bahat do odoranni sidea, manratus do na laho hu Hapoltakan. I bagas na opat bulan in, paima das i Padang Rapuhan, inunut tulangni ondi marsuji Tuan Sormaliat taringat bani pambotoh, sonai age haguruan, sonai age hadiharon, sonai homa hatortoron, sonai age hasaruneion, seng na lang ibotoh, ibotoh do ai haganup. Parsujian mula-mula iboban tulangni ai ma panogolanni ai hu pohon, ipatuduhkon tulangni ai ma bolag ni panuanan ni tobu ondi. Domma rahrahan tobu ai, nini tulang ni ai ma: “O Sormaliat”. “Ou Tulang”, nini. “Boishon ma tobu on ambia i bagas na opat ari on, anggo na tongon ma ho guru”. Marbalos ma panogolanni ai: “Naibata do guru Tulang, anggo au seng guru”. “Age nai boiskon ma tongon i bagas na opat ari on”. I bagas na opat ari ai tongon, domma bois tobu ondi ihilhili, sompah-sompahni mando ragei i bona ni tobu ai. Ai gajah do isuruh Tuan Sormaliat borngin-borngin mamboiskon tobu ai. Tapi anggo bogas ni naheini gajah ai si Sormaliat do pasusihkon. Dob ai mulak ma ia hu huta. “Ai ma torih ham Tulang, domma haganup hupangan tobu ia ganup, sappah-sappahni ijai do”. Roh ma tulangni ai tongon manonggor, domma tongon ripas ondi sapohon. Nai isuji tulang ni ai do ho ma use.

Jumpah ari patarni, isuruh mambuat rudang, goranni rudang ai, aima rudang hapias i atas hayu na ganjang do, anjaha gok huramah ampa pandoit i bani rantingni hayu ai. I ujungni hayu ai do hapias ondi tubuh. Jadi isuruh si Sormaliat ai ma na mambuat rudang hapias ai manuk-manuk namargoran layang-layang mandi. Ai ma namambuat rudang ai hunnatas hayu ai. Naso nididah ni halak, dob dapot rudang ai, itektekhon layang-layang mandi ai do hu lobei ni si Sormaliat. Iberehkon ma bani tulangni. Iberehkon tulangni ondi ma deba bani si Sormaliat, nini ma: “Taruhkon rudang on bani anggimai, hubani si Rongga Huning”. Laho ma tongon ia manaruhkon, das ma i bonani andar pantangan si andang na manrahutkon golang-golang na marandarhon bosi, hape na dob igantih tulangni ondi do anak tanggani andar ai ma pisou parsuhur, seng tardalani be. Maruhur ma si Sormaliat, ibaenkon ma hu bagas sampak hotang rundang ondi, nini ma mangampi sampak hotang ondi: “Ou raga bayu, taruhkon ma rudang on hu lobei ni panak boru”. Jadi iampit ma sampak hotang ondi, das ma bani pantangan ni panak boru. Jadi roh ma panak boru, ijamai ma homa ampa sampak raga ondi. Jadi marhatama Tuan Padang Rapuhan: “Naha do ambia, domma nani iberehkon ho”. “Anggo hutaruhkon lang Tulang, huberehkon do hansa”. “Naha ubahni namanaruhkon ampa namamberehkon ambia?” nai ma nini tulangni ondi. “Ia lang pe dong ubahni namanaruhkon ampa na mamberehkon Tulang, anggo rudang ia, bani borumu”. Dob konsi ai mulakan bei ma na marsampak hotang, ai seng ijibe sampak hotang. Ipangindahi sidea seng jumpah. Dong ma sada dakdanak na patugahkon, iabianganni panak boru do sampak hotang iampit Tuan Sormaliat. Roh ma parsampak hotang ondi use hu lobei ni Tuan Sormaliat nini ma: “Ise do suruhanta tuan nami mangalop sampak hotang ai? Agendo marsampak hotang hanami”, nini halak ondi. Jadi marhata ma Tuan Sormaliat, idilouma sampak hotang ondi: “Ou raga bayu, susur ma ham hu toruh, ngolngolan do ijon na si bapa marsampak hotang”. Sip do anggo panak boru ondi i partonunan ai seng ra mandabuhkon na manangkih andar ondi pe seng pag. Mabiar do mandogei anak tanggani andar ondi halani ibahen marotni. Ai parsujini tulangni ondi do, ase ibaen anak tangga ni ai marot, ampa indahanni panak boru ai pe na dob sirsir do ijai, seng ia marna mulak hu toruh.

Jumpah ma bodarini ibotoh tulangni ondi ma na dop i pantangan ai sampak hotang ondi halani na buei ma hasoman na mulakan seng marsampak hotang, marhata ma tulang ni ondi: “Alop sampak hotang ai patar ambia girah, age sonari sompat ma mangalop ai”, nai ma nini tulangni ondi. Marhoru ma Tuan Sormaliat, nini ma mambalosi: “Dapotma Tulang, anggo boi hape hualop, ia lang boi hualop Tulang, se dear do na paturei sampak hotang?” Jadi marbalos ma tulang ni ondi: “Ia, anggo ai do da ambia”, nini. “Anggo nini uhurhu dear do, mase lang dear? Nai age ningku, ai lang parsampak hotang ai do sungkunon? Atap seng dear uhur ni sidea?” Dob ai mangan ma sidea. Salpu na mangan ai laho ma Tuan Sormaliat ondi hupodomanni hu jambur.

Kira-kira tongah borngin laho ma ia hu darat ni huta, tangis ma ia ijai, roh ma urang bunian ondi marayakhon bana, nini urang bunian ondi ma: “Mase ho tangis Sormaliat?” Ibalosi ma urang bunian ondi: “Ompung, se tangis pe au, pisou parnabung do anak tanggani andar ni pantangan si andung-undung, seng tardalani au mangalop raga bayu. Lang-lang do nantuari marsampak hotang parhuta Padang Rapuhan on”, nai ma nini Tuan Sormaliat ondi. Marbalos ma urang bunian ai: “Tenger ma uhurmu”. Isuruh urang bunian ondi ma homa rajani tanggiling nansa untei puraga do banggal ni, ganjangni sanjongkal, ia ma na manansahi anak tanggani andar ai. Balun ma anak tangga ai, jadi laho ma si Sormaliat ondi hu atas pantangan si andang undung ai. Tarhinjat ma panak boru ondi hu atas pantangan si andang undung ai, ai domma bagas borngin panroh ni tuhan ai. Nini ma: “Ise do on?” Ibalosi ma: “Au do in panak boru, Sormaliat do goranku”. Jadi ipasang sidea ma ijai parpalitaan pantis, sanggah ai opei parpalitaan ijai ai. Taridah ma tongon rupahni Tuan Sormaliat, anjaha nini ma: “Mase ma lang holong uhurta bangku panak boru?” “Sonaha parholongni uhurhu bamu tuan nami?” nini panak boru ondi. “Ai domma bamu tanda hata hunbangku. Domma bangku tanda hata na hunbamu”. “Sedo ai ase roh au panak boru”, nini Tuan Sormaliat ondi. “Aga do?” nini panak boru ondi use. “Sampak hotang nantuari do. Seng idabuhkon ham hu toruh. Ai ija do ibahen ham sampak hotang ai? Bere hita ma bangku”. “Ai marsampak hotang borngin?” nini panak boru ai. “Patar boban ham atap alop ham. On borngin do ijon ija ma halak marsampak hotang borngin?” nini panak boru ondi. “Na ija do asi hata sitangkapon anjaha na ija sipaluahon?” nini Tuan Sormaliat. “Ai na ija nini uhurmu tuan nami?” “Dong sapahara hata mamboban, dong sapahara hata mangalop”. “Anggo ai tuan nami, pilih hita ma”. Borngin ni ai lalap seng tarpodom sidea, ai domma ihatahon Tuan Sormaliat: “Anggo uhurhu do sungkunon panak boru, hata mambobanma. Tagaran malah huboban sampak hotang in ase hualop”. “Tapi domma putus sahapku nongkan”, nini panak boru ai. “Seng adong halak marsampak hotang borngin, arian do tuan nami”.

“Na hubotoh pe sonai do panak boru”, nini Tuan Sormaliat. “Anggo sonai, mase sonari boanonmu?” nini panak boru ondi. Marsampang ma Tuan Sormaliat ondi: “Antigan do boanonku lani?” Marsampang ma panak boru ondi: “Patar ma da hubotoh”. “Ia patar ma ninta panak boru, patar ma hape” nini Tuan Sormaliat ondi. Dop ai marsahap ma sidea sambil mardemban-demban, ia sahap ni sidea sahap na legan-legan mando.