Haor na marsahapa ondi sidea, ipahumuhi Tuan Sormaliat ondi ma dirina, nini ma: “Dung ma parsahapanta ai panak boru, laho ma au modom hu jambur”. Ipakulah ma ia songon na susur hu anak tangga ai, domma idalani satangga, laho hu toruh, hape anggo bohini taridah opei. Nini panak boru ai ma: “Naha do nani sampak hotang saud ni? Atap na mangalop atap na mamboban do?” “Tapi nongkan hata panak boru patar huboban”. “Nai ma da anggo ra hama manuhuni parpadanan ai”. “Ra ma au panak boru”. Nini Tuan Sormaliat. “Ija do ham na ra ai. Ai anggo patar na mangalop ma. Seng be na mamboban be ai”. Longang do uhur ni Tuan Sormaliat ondi na mambogei hata ai. “Ulang hita longang tuan nami. Nanget-nanget uhurhon hita hata ai. Na mangalop ampa na mamboban.
Tongon namin aik na mangalop pe saud do iboban, ambit na mamboban pe tong do iboban”. Jadi maruhur ma ia use: “Naha ma nani partibalhu ampa parhundulhu?” Jadi marsampang ma panak boru ai: “Ai manungkun pe hita partibalta ampa parhundulta tuan nami?” “Lang panak boru. Anggo natuduhkon holi songon na danak uhurta”. Jadi ipatugah panak boru ondi ma: “Ia parhundulta tuan nami bani lage-lage in ma anggo na huida, ampa partibalta pe i atas pantangan on ma anggo na huidah. Atap na i ladang nuan atap na i juma hita hundul iahapkon hita, uhurta ma mambotoh”. “Sintabi panak boru” nini Tuan Sormaliat ai “Tongon i atas pantangan on do au na hundul on ampa ilobeinta, tapi songon na i ladang do anggo i bagas paruhuranku”. “Ai da tuan nami, uhurta ma. Na padohor pe ijon anggo na i ladang do uhurta, ai uhurta ma hape”. “Anggo uhur hai do panak boru na mambahen bobanon ampa na mamboban luarhonon si mata hisir-hisir ma da panak boru, si mata hosor-hosor; sanjongkal pe gelah ulang misir, odohon jari pe lah ulang mosor”. Lambin ipadohor Tuan Sormaliat ondi ma hubani panak boru ai. Anjaha ihatahon ma hatani hubani panak boru ai: “Sintabi banta panak boru, ra ma nini uhurhu lobih ma satongah dalan hu Parpandanan na Bolag”. Marsampang ma panak boru ondi: “Ai na ulang do gakni ai uhurta tuan nami?” “Lang panak boru”, nini tuhan ai. “Anggo sonai aha ma gakni sisahapkonon panroh ni sidea? Ijin hape panrohni ijin ma”. Marsampang ma tuhan ondi: “Bonar ni uhurta do panak boru mambahen sungkunonku”. “Songon na lepak do huahap parhatanta tuan nami”. “Aha lepakni ai panak boru?” Jadi nini panak boru ondi ma use: “Tapi domma huborei tanda hata, ijai ma patanda bonar”. Jadi marsampang ma Tuan Sormaliat ondi: “Urat ni tabu dondang panak boru, manjulur hu batang iou; surat ni uhurta bonar, hita namin margantih hiou”. Marsampang ma use panak boru ondi: “Ai tuan nami, halambir sungai sordang, pultak hu huala padang; anggo tarhatahon goran, pantangan ni parinangon ibannami parinangon i Nagori Hapoltakan on. Seng songon timbahou i tiga tuan nami, palobei idai ase iboli”. Lanjar ipaabingkon Tuan Sormaliat ondi ma uluni hubani abingan ni panak boru ondi anjaha masarsar ma jambulanni, domma morum bauni jambulan ondi. Marosuh tumang ma panak boru ondi manganggoh bauni jambulanni Tuan Sormaliat ondi. Lanjar siang ma ari seng pala tarpodom anggo sidea ai, tolu do sidea i atas pantangan si andang undung ai.Iboan Tuan Sormaliat ondi ma sampak hotang ondi. Das ia i alaman iberehkon sampak hotang ondi bani si jaga sampak hotang.
Hira-hira pangului mata ni ari marsampak hotang ma sidea, dohot ma Tuan Sormaliat marsampak hotang ai. Iampit singkuta ai ma sampak hotang ai dompak Tuan Sormaliat, iampit Tuan Sormaliat ma dompak gamot Padang Rapuhan, ai pulung do ijai anakni raja-raja na marsampak hotang ai. Seng ongga manlapaki Tuan Sormaliat, anggo mangampit sampak hotang, ampa niampitni do sigijangan sampak hotang ai. Kira-kira songon na manonga-nonga langit do tonggoron anggo tuan ai mangampit sampak hotang ai, lenggangni pe tarsurung, elakni pe tarlobih baen tonggoron ni halak ganupan. Anggo panak boru Nansanduk di Hataran sai hubani Tuan Sormaliat do panonggorni matani, biar pe ipaunduk pardalanni serlem do tong panonggorni dompak anak ni amboru ni ai.
Laho hu bah ma panak boru Rongga Huning ai ma na margoran Nansanduk di Hataran ondi mamboban batil omas paranggiranni. Sai tong do pangkawahni otik dompak Tuan Sormaliat turun-turun mardalan ia. Nai age Tuan Sormaliat songon na martomu i awan-awan do panonggorni sidea. Ai hona do tene na mandormai, hona do pakon nidormaan. Nai ma hape dorma ni si tengger na madaoh. Dob salpu na marsampak hotang ondi mulak ma ia hu lopou anjaha marindahan idangan ma bana i lopou, idangan minum, na ni idangan mangan, pargulei i bagas piring, rongkop ni indahan sapu tangan.
Dob ai hira-hira sapuluh borngin nari, roh ma na hun Parpandanan na Bolag. Hira-hira satongah arian nari dalanan das ma na roh hun Parpadanan na Bolag ondi. Dohorhon Padang Rapuhan, mariah ma sora ni bodil, mariah homai hatani gonrang, anjaha iatur gamot Padang Rapuhan ma homai na mangalo-alo, mariah homai sorani bodil, mariah homai sorani gonrang, ai ma gonrang pangalo-alo. Tapi anggo hohomom ni na roh domma sirsir ibahen gamot Padang Rapuhan. Sonai age atur ni boras, sonai age ansubah, sonai age soban. Domma tambat lombu, nai age horbou mambahen ambangan ni na roh ai.
Das ma na roh hun Hasundutan ondi i harbangan, sompat ope maronja-onja tongkin pangulu dusun na hun Parpandanan na Bolag pakon pangulu dusun na i Padang Rapuhan. Ioruk nasida ma pintu-pintu ai, seng ilopas nasida hu huta anggo lang dong buka horbangan. Ai do ulih ni gamot pakon pangulu dusun. Botul do namin hinatahon ni sidea ai, anggo pamatang holi hu tongah do. “Tapi ningon anak manembak do na mambahen buha horbangan, anggo hanami seng mambere buha horbangan ge ipindo nasiam halani hanami anak bagas do”. “Nai pe bere nasiam do tastas partoguh hape”.
Ibalosi sidea ma hun darat: “Seng dong tastas partoguh bahenon nami. Aha halani ase berehonnami tastas partoguh?” “Parmasuk ma hape bere nasiam”. “Ia, na dob masuk do anak nami i huta ai ma si Sormaliat”. Talu ma halak gamot na i Padang Rapuhan, ibuha ma horbangan ondi. Dob konsi das i huta, iberehon na roh ai ma horbou naboban ni sidea, nai homa gamot Padang Rapuhan iondoskon ma rumah kohoman ondi bani sidea, marsiontou kohomanni bei ma.
Patarni use, roh ma gamot ai pakon gamot ni Padang Rapuhan hu lobei ni anak raja na adong i Padang Rapuhan pakonni partua, Tuan Subi, pardalan tapian. Rup ma sidea ai ganup hu lopou, ipatugah sidea ma panrohni na hun Parpandanan na Bolag. Runggu ma sidea ijai, anggo parsahapan ai seng pala bastu anggo raja. Gamot ai pakon pangulu dusun do hansa marsahap.
Dob ma dung rungguan ni sidea ai, ai mando sungkunon bani guru huta Padang Rapuhan atap guru huta on. Roh ma guru ai, itorih ma parbulanan pakon panjahai ni ari. Dong sapuluh tolu borngin nari ase bou martomu bayo palahohon baru atap parohkon boru. Sunggu bajik martomu bayo ma in nini guru ai. Nai ma panjahai ni parbulanan ai. Dong homai ope guru na legan, tar opat halak nari. Runggu ma sidea ijai samah guru. Roh guru na sada use mangkatahon, “seng madear anggo ijai hubotoh”. Naha do guru na legan homai. Anggo palaho boru gan i bani bulan siopat-opat samisara bona turun, naha pe mantadingkon na kahou do bagian boru na ni alop ai. Marsampang homai ma guru na legan, ai ma sada na margoran Datu Tinggir ni Gunung, seng ra ia mangan anggo lang tinutung, ai sintong-sintong tumang do hatani haguruonni anggo na dob salpu in. Non ma nini guru ai: “Naha pe anggo palaho boru i bagas na sapuluh tolu borngin nari mangankon ma sionou bali sabulan pakon patihorta di lautan mangan homai nagalumayang, runggu na tolu in pasayurhon si angga sana hona pangarumai ni raja, naha pe in maningon mabalu do boru na ni alop in. Seng pala martading anak matei ma ia. Tapi seng pusa. Longang do gamot ondi pakonni raja-raja membogei hatani Datu Tinggir di Gunung na so marulos anggo lang bolion gunung, na so ra mangan anggo lang margulei tinutung.
Marsahap ma gamot ni Parpadanan na Bolag pakon gamotni Padang Rapuhan, nini sidea ma: “Pasaud hita ma hatani guru huta on, sapuluh tolu borngin nari ma. Seng niarusan hatani Guru Tinggir Gunung in. Ibogei hita ma sahapni ai, mabalu gan pala martading anak, tapi seng pusa, sahap na sonaha binotoh in”. Nai ma panriahan ni gamot ondi angkupan. Putus panriahanni sidea ai, ipatugah ma bani rayat sihabolonan. Ipatugah rayat sihabolonan ma bani anak raja, ipatugah anak raja ai ma bani tongah, nini ma: “Iak, domma putus riah ni gamot huta on ampa pangulu dusun, ase na paingkat ma panak boru Nansanduk di Hataran”, nai ma nini anak ni raja ai dompak tongah. “Anggo nai ma hape, nai ma”, nini tongah. Laho mai use binuatni anak raja ondi ampa puang panggamot hu rumah bolon patugahkon parsahapan ai: “Sapuluh tolu borngin nari mando buhul, ai ma nini guru huta on”. Marsampang ma puang bolon ondi: “Iak, anggo nai, naha ma panriahan ni gamot huta on ampa harajaon huta on?” “Anggo ai do lani ibaen panroh nami on pe ra ibotoh hita”. “Ah bayakku”, nini puang bolon ondi, “Inang-inang ni harajaon huta on do hape ampa puang panggamot na roh in”. Dob ai idilo sidea ma panak boru Nansanduk di Hataran. Roh ma panak boru ai, isahap nasida ma parsahapan ai. Songon na mangojur ma gakni, tapi anggo panak boru ai songon na manahan do. Agepe malas uhurni anjaha dear-dear ma iunung-unung sidea panak boru ai, nini puang panggamot pangulu dusun ai ma: “Panak boru, aha do gakni sipindoonta, ulang hita songon na manahan, pindo hita humbannami. Seng dong ise na bador, anggo seng saud hita hu Parpandanan, gamot huta on do ijai na bador ampa pangulu dusun”. Marsampang ma panak boru ai: “Sonaha ma ningon, hu turut sahap nasiam ai, das holi au hu Parpandanan huhasomalhon pe lang dong ijai, na hutandai pe lang dong, ise ma parsahapkononku? Ai lang marsuruh mandolos ma nasiam ai?” nai ma nini panak boru ai. Marsampang ma puang panggamot ondi: “Napaingkat gakni hasomanta panak boru sapulu dua halak anak boru, opat na marumah tangga, ai lape adong parsahapanta i Parpandanan na Bolag siap arian ampa siap bodari?” nai ma nini puang panggamot ondi. Dob ai sip ma panak boru ondi. Songon na mangihut so mangihut, songon na manahan so manahan. Nai ma pambalosini. Dob konsi ai mangan ma sidea haganup.
Dob konsi salpu na mangan ai, manungkun ma gamot ai pakonni pangulu dusun: “Eak, sonaha do putus ni parsahapan hu rumah bolon?” nini pangulu dusun ai. Marbalos ma puang pangulu dusun: “Anggo hubani puang bolon huta on, seng sonaha, mangihut do songon riah hun lopou on”. “Eak, naha do use”, nini puang gamot ai, “panak boru mando songon na mangihut so mangihut, songon na manahan so manahan”. “Aha gan?” nini gamot ai. “Aha hurangni panak boru niborei”. “Ida domma isungkun hanami”, nini puang panggamot ai homani, “hasomanni pe domma iparbagah hanami sapuluh dua halak, opat rumah tangga homani, sibar sonai ma hansa ibotoh hanami. Inpe anggo dong do podah humbai nasiam bapa hunjin ase itaruhkon hanami hu rumah bolon”, nai ma nini puang panggamot ondi. Marhata ma pangulu dusun ondi use: “Iak, laho ma hita hu rumah bolon tapang, nai ge gamot huta on, nai ge anak raja huta on, nai homa pardalan tapian nai homa Tuan Suhi”.
Tapang ma sidea ai haganupan hu rumah bolon; hu lambungni panak boru Nansanduk di Hataran. Marsiluarhon hatani bei ma sidea, taringat bani parpaingkat ni sidea, songon na mambere pangajar-ajarion. Dong na marbagah horbou satangga, nai ge pardalan tapian, iparbagah do horbou sada. Nai ge Tuan Suhi, iberehkon do lombu sada. Nai ge rayat sihabolonan, iberehon do lombu sada, nai ge anak ondi iberehon do golang pakon hiou, nai ge bantal ampa tilam iparbagah bani panak boru ondi. Putus parsahapan ai, anggo panak boru ai sip do. Marhata ma puang bolon: “Iak, mulak bei ma nasiam, palis na tilip mando ai, mangiak do na sip”. Dob ai mulak bei ma.
Das tongon sapuluh tolu borngin ai ipaingat sidea ma panak boru Nansanduk di Hataran hu Parpandanan na Bolag, ramei ma hata-hatani gonrang, mariah hatani olob-olob, mariah homai sorani bodil. Boratan do na sapuluh dua halak anak boru ondi mamboban hiou barang ni panak boru ondi tambah homai do na manaruhkon rayat, dong siboban bantal, dong siboban tilam, dong siboban batil omas, ai ma mambahen paranggiran ni panak boru ondi. Ia dalahi, ai ma na manogu horbou pakon manogu lombu, dong homai siboban boras bohal ni sidea i dalan. Das do nasida tolu bulan i dalan, halani nanget-nangetni sidea mardalan.
Hira-hira sanlambar juma nari mandapotkon Parpandanan na Bolag roh homai na mangalo-alo hun huta, anjaha igual ma homa gonrang, ai ma gonrang pangalo-alo. Marhata sihoras ma jolma simbuei anjaha marolob-olob mangolobkon panrohni panak boru ai.
Das ma i rumah bolon, hundul ma sidea ijai haganup, hu siamum ma dalahi, hu siambilou ma naboru. Anjaha ipapohulma. Ia pamohulni sidea marindahan layam mardengke saur bah. Jadi mamohul ma sidea. Martonggo-tonggo ma guru ijai, ia hatani tonggoni non do: “Marbunga ma sihala gundi, manjulur singkotari. Tubuh ma boru nauli, anak songon na suan mata ni ari. Ompung Naibata olobkon hita”. Jadi marolob-olob ma jomla simbuei, “olob-olob”. Ganup ma mangkatahon ai. Iulaki use mambahen pasu-pasu ai. “Bintang na rumiris, ombun na sumorob, anak pe riris, boru pe torop. Andur hadungka ma Ompung Naibata, patogu-patogu lambu, saur matua ma Ompung Naibata, puang namion patogu-patogu pahompu, anjaha ando aras andor ris, anjaha horas-horas, torkis-torkis, horas, horas, horas”. Naima nini guru datu ai. Dob ai mangan ma sidea, sonai ge jolma simbuei.
Jumpah air patarni anjaha manrajah ma, ai ma na manrajahkon Tuan Sormaliat na manjadi Raja Parpadanan na Bolag, na manrajahkon panak boru Rongga Huning na manjadi puang bolon Parpandanan na Bolag.
Iiring ma laho hu bah na mamboban paranggiran ai ma batil omas pakon suruy omas, ipanggualhon gonrang arah-arahon ni iiringkon gamot ni gamot ganup pakon pangulu dusun. Asok-asok do mardalan lahi hu bah ai. Hira songon na manapaki do anjaha marpandihar hu lobei. Dob si ase raja ai, dob ai ase puang bolon, dob ai puang pangulu dusun anjaha marpakean do ganup iiringkon hopala omas iiringkon hopala perak martumbuk lada, marpisou horis, margantar, martumbuk marjambi-jambi, tapi anggo mamboban anggir guru do marbaju-baju saholat marpamonting padang rusak, margotong-gotong sitolu tompan.
Das ma i bah ipartimbun ma horsik paranggiran, mangkuk putih ma paranggiran ai, guru ai manabasi anggir ai. Dob konsi itabasi anggir ai, iinum bei ma, ai ma na margoran pangurason. Ia goranni pangurason ai, pangurason so habubuhan, seng malo be haliaban, seng malo be habubuhan, raja huta on Ompung Naibata, nai ma nini guru ai. Tapi anggo paranggiran batil omas ondi, untei mungkur homai do anggir ai, ai ma inahkon bani ulu anjaha marsuruy bei ma na maranggir ai, suruy omas ondi ma anggo suruy ni puang ai. Suruy tanduk do anggo suruy ni rayat sihabolonan. Dob ai mulak ma sidea hun bah ai. Odor homani do mardalan, seng bulih marsilojo-lojoan songon na maratur do pardalanan ai, anjaha tunggung.
Marhata ma homa gonrang ai laho hu hu huta. Ipanggualhon gonrang si porkas do nipasompulhon sarunei arah-arahan. Sanggah i tongah dalan, gonrang hitei dalan ma goranni, das ma i horbangan, gonrang manandangi hohoman ma goranni, das ma dohorhon rumah, dua andar hu lopou ma goranni gonrang ai. Dob das i rumah, hundul ma tuhan ma goran ni gonrang ai. Dob ai igualhon ma gonrang namanundalhon layam. Dob salpu igual homa ma gonrang sampang apuran, sanggah marsidembanan ijai. Salpu sibuha lunglungan ma goranni, salpu si sabsab ma goranni, nai ma goran-goranni gonrang ai haganup. Sonai age sarunei, sonai age sorani gonrang ai mubah-ubah do tongon. Ai songon gonrang ai do ijai na marhata-hata. Ai ma na ginoran gonrang panrajah. Anjaha ibahen do sada tanda humbani puang bolon ai age hubani raja ai, ipatampeihon sihilap ai jongjong ma sidea laho hu alaman bolag mangadobo (manloloi) horbou tortoran ai, na arih bani dua arihan, aima arihan boru-boru ampa arihan tunggal.
Arihan tunggal: lambei gorsing, lunjung buhit ampa bulungni hotang ibabouni arihan ai ma jadi bungani. Arihan boru-boru aima: Iangit do aribut i atas bahen ianan ni tanoh anjaha isuani do ijai sagala suan-suanon, sonai homa sagala rudang-rudang, songon na jombut do arihan ai tonggoron anjaha tunggung.
Itambathon ma horbou tortoran ondi bani arihan ai anjaha homa ma ai. Ia rudang ni horbou ai aima bulung-bulung jungjung buhit, bulung ni sori marnayok, banei pansur, bulung ni hotang, isangkuthon ma bani bonang manalu, inahkon ma bani uluni horbou ai. Sangkolak do ganjangni tali ni horbou ai humbani arihan ai, andor do tali ni horbou ai humbani arihan ai, hotang do hulang-hulangni arihan ai. Dob ai isaburi ma bani boras, guru ma manaburhon boras ai, i bagas balbahul na bayu do boras ai inahkon. Dob ai marmangmang ma guru ai, tapi anggo guru parmangpang ai seng dong i Parpandanan na Bolag bei ai, guru na hun lambung mando ai halani seng dong Guru Gumbak na Bolon be. Tapi anggo mangmangni guru ai, aima tonggo-tonggo. Itonggo debata di atas, itonggo homa debata di tongah, itonggohon debata di toruh. Aima targoran dong debata tolu sintolu gugung sisada harajaan. Dob ai itonggohon homa ma bani desa na waluh. Abisma ma mangmang ai, marhata horas-horas ma haganup jolma simbuei tapi anggo sanggah marmangmang ai, sib do lobei hatani gonrang. Dob salpu ai marhata ma gonrang, manortor ma sidea haganup. Pitu hali iinggoti horbou ai, anjaha raja-raja do haganup na bulih manginggoti horbou ai, anggo rayat seng dihut manginggoti horbou ai, songon na maratur do pardalanni sidea manginggoti horbou ai atap manortorisi pe.
Dob ai ipantom ma horbou ai. Anggo namamantom horbou ai seng guru ai, dong do sada harajonni ai. Nai ma nini mamantom horbou ai, sanggah taon tanja ai ijolom marhata ma ia, nini ma: “Hupantom ma ale amang na torob!” Marbalos ma jolma simbuei: “Ulang tarpinggol!” “Hupantom ma ale amang na torob!” Dong na marbalos: “Ulang tarulu!” “Hupantom ma ale amang na torob!” “Ulang tarpopat!” marhusor use si pantom horbou ondi. “Hupantom ma amang na mabuei!” “Ulang tarpogu!” “Hupantom ma ale amang na ma buei!” Balosni haganup: “Pantom ma!” dob konsi ipantom hitir ma horbou ai, marumbak ma anjaha itundali rumah bolon otik. Dob konsi ai marsaran ma hata ni gonrang. Songon na longang bei do hasoman otik, sagala na mambotoh liat-liatan, ihatahon do seng horbou huta in, halani itundali rumah bolon.
Dob ai irangrangi ma horbou ondi, ibagi ma gulei ai hubani harajaon huta pakonni haganup sagala panduduk na i Parpandanan na Bolag marguru hu bagianni bei. Gulei panrajah ma goranni. Nai ma adat bani Parpandanan na Bolag.
Dob irajahkon Tuan Sormaliat jadi Raja Parpandanan na Bolag, seng boi be ia igoran tuan. Anggo dong na manggorani tuan, igalar ma gulei panrajah ondi, na songon uhuman, anggo seng na tinuntun ni.
Dob salpu horja ai, isungkun harajaan huta Parpandanan na Bolag ma guru atap sonaha pangidahan pasal horbou pinantom ondi, aima horbou panrajah ondi. Marbalos ma guru ai: “Anggo pangidahan bani horbou, na manrajahkon raja huta on, domma saud ia jadi raja bahen ihut-ihutanta. Tapi dong otik i pudian ni ari, boa-boa ni Ompung Naibata”. “Sonaha ai gakni?” nini puang harajaan huta ondi. Marhata ma guru ai: “On do na porlu sijagaon i pudian ni ari, ai ma: ra roh bah naso binoto hu pogu ni tataring”. Jadi ipatugah harajaon huta ondi ma hata ai bani tongah Parpandanan na Bolag. “Ai do hansa?” nini tongah ai. “Lang be be nini guru ai”. Dob ai marhata horas-horas ma guru ai. Ipaingkat ma guru ai laho mulak hu hutani, ibere sanlambar hiou, ibere boras satumba, dayok sada. Nini puang panggamot ai ma mamberehkon boras ai bani guru ai: “On ma sihoras-horas guru, parpaingkat nami bamu, paima roh hanami hu rumahmu, manggalar utang nami, asalma horas-horas hita haganup sonai age raja huta on, nai puang bolon huta on”.
Nai ma dob ni parsahapan ai, anjaha iberehkon sidea ma tulan tangan martintin (gulei panrajah). Dob ai igual gonrang sahali nari, ia goranni gonrang ni ai ma gonrang paulak sinaraya. Manortor ma sagala na sihol manortor bani gual ai. Salpu ai mulak bei ma na sinaraya.
Tidak ada komentar:
Posting Komentar